English 
රබර් ආනයනය කිරීම වැළැක්වීමට සුදුසු පියවර ගන්නැයි වාර්තාවක් – මුදල් රාජ්‍ය ඇමැති සියඹලාපිටිය
ප්‍රමාණය ඉක්මවා අමුද්‍රව්‍යයක් ලෙස රබර් ආනයනය පිළිබඳ සොයා බැලීම සඳහා පත් කළ කමිටුව මගින් අනාවරණ කර ගත් කරුණු සුදුසු ක්රියාමාර්ග ගැනීම සඳහා ජනාධිපති රනිල් වික්‍රමසිංහ මහතා වෙත ඉදිරිපත් කරන බව මුදල් රාජ්‍ය අමාත්‍ය ආචාර්ය රංජිත් සියඹලාපිටිය මහතා පවසයි.
රාජ්‍ය අමාත්‍යවරයා මේ බව පැවසුවේ මුදල් අමාත්‍යාංශයේ දී මේ පිලිබඳ පැවැති සාකච්ඡාවේ දීය.
2022 ඔක්තෝබර් මස 09 වැනි දින අදාළ කමිටුව පත් කෙරුණේ වැවිලි කර්මාන්ත අමාත්‍යාංශ ලේකම් බී.එල්.ඒ.ජේ. ධර්මකීර්ති මහතාගේ ප්‍රධානත්වයෙනි. මෙම කමිටුව මගින් ගනු ලැබූ ක්රියාමාර්ග හේතුවෙන් අතිරික්ත රබර් ආනයනය ශීඝ්‍රයෙන් පහළ වැටිණි. 2022 වසරේ දෙසැම්බර් මාසයේ දී ඉකුත් වසරේ එම මාසයට සාපේක්ෂව රබර් ආනයනය 93%කින් පහළ වැටුණු අතර රබර් ආශ්‍රිත නිෂ්පාදන අපනයනය ද 39%කින් ඉහළ ගියේ ය.
මෙම කමිටුව මුදල් රාජ්‍ය අමාත්‍ය රංජිත් සියඹලාපිටිය මහතාගේ ප්‍රධානත්වයෙන් රැස් වෙමින් දීර්ඝ වශයෙන් කරුණු සාකච්ඡා කළ අතර විටින් විට මතු වූ තත්ත්වයන්ට පිළියම් යොදමින් දේශීය රබර් වගාකරුවා ආරක්ෂා කිරීමට පියවර ගත්තේ ය.
වැවිලි කර්මාන්ත අමාත්‍ය වෛද්‍ය රමේෂ් පතිරණ මහතාගේ ද සහභාගීත්වයෙන් පැවැති මෙම විශේෂ කමිටු රැස්වීමේ දී තව දුරටත් විවිධ ක්‍රමවේදයන් ඔස්සේ ආයෝජන මණ්ඩල අනුමැතිය සහිතව සහ රහිතව රබර් ආනයන කරන ආකාරයන් කිහිපයක් පිළිබඳ කරුණු සාකච්ඡා කෙරිණි. විශේෂයෙන් ම ඇතැම් බහුජාතික සමාගම් රබර්වල ගුණාත්මකභාවය හුවා දක්වමින් ඉහළ මිල ගණන් යටතේ තව දුරටත් රබර් ආනයනය සිදු කරන බවට තොරතුරු මෙහි දී අනාවරණ විය.