හේලීස් සමූහ ව්‍යාපාරයට අයත් Advantis සමාගම, ලොව ප්‍රමුඛ බර එසවීමේ යන්ත්‍ර සමාගමක් වන Sarens සමඟ එක්ව මෙට්‍රික් ටොන් 900ක ධාරිතාවකින් යුත් දොඹකර යන්ත්‍රයක් සිය මෙහෙයුම් සඳහා එක් කර තිබේ. මෙය ශ්‍රී ලංකාවේ දැනට පවතින විශාලතම දොඹකර යන්ත්‍රය ලෙස හඳුන්වා දී ඇත.
මෙම නව යන්ත්‍රය මඟින් පුනර්ජනනීය බලශක්ති ව්‍යාපෘති, යටිතල පහසුකම් සංවර්ධන කටයුතු සහ මහා පරිමාණ කාර්මික ව්‍යාපෘති සඳහා අවශ්‍ය බර එසවීමේ හැකියාව Advantis සමාගමට තවදුරටත් පුළුල් වේ. සමාගම සතු මෙට්‍රික් ටොන් 280ක ධාරිතාවකින් යුත් දොඹකර ඇතුළු විශේෂිත උපකරණ සමූහයට මෙම නව යන්ත්‍රය එක්වීම විශේෂත්වයකි.
මෙම යන්ත්‍රය යොදා ගනිමින් Haywind One Limited සමාගම ක්‍රියාත්මක කරන මෙගාවොට් 50ක සුළං විදුලි ව්‍යාපෘතිය සඳහා අවශ්‍ය සැපයුම් සහ මෙහෙයුම් සහාය ලබාදීමටද Advantis සමාගම කටයුතු කරමින් සිටියි. වරාය මෙහෙයුම්, ප්‍රවාහනය, ව්‍යාපෘති භූමියට උපකරණ ගෙනයාම සහ ඒවා ස්ථාපනය කිරීම ඇතුළු කටයුතුද එම සේවාවලට ඇතුළත් වේ.
Advantis සමූහ ව්‍යාපාරයේ කළමනාකාර අධ්‍යක්ෂ රුවන් වෛද්‍යරත්න මහතා සඳහන් කර ඇත්තේ, මෙම ආයෝජනය මඟින් ජාත්‍යන්තර ප්‍රමිතීන්ට අනුකූල මහා පරිමාණ ව්‍යාපෘති සඳහා අවශ්‍ය දේශීය ඉංජිනේරු හා මෙහෙයුම් හැකියාව ශක්තිමත් වන බවයි.
Sarens සමාගම සමඟ ඇති සහයෝගීතාව හරහා ඉහළ තාක්ෂණික දැනුම සහ ජාත්‍යන්තර අත්දැකීම් දේශීය ව්‍යාපෘති සඳහා යොදාගැනීමට අවස්ථාව සැලසෙන බව Advantis පවසයි. මෙම පියවර ශ්‍රී ලංකාවේ යටිතල පහසුකම් සංවර්ධනයට සහ පුනර්ජනනීය බලශක්ති ක්ෂේත්‍රයේ ව්‍යාපෘති ක්‍රියාත්මක කිරීමේ හැකියාවට දායක වනු ඇතැයි අපේක්ෂා කෙරේ.
