ඓතිහාසික මහනුවර ශ්රී දළදා මාලිගයෙන් ආරම්භ වූ ‘ඒහිපස්සිකෝ’ සාම පාගමනේ තෙවන දිනය කිලෝමීටර් 25ක දුරක් ගෙවා අද (24) පස්වරුවේ මාවනැල්ල, බෙලිගම්මන රජමහා විහාරයෙන් අවසන් විය. වියට්නාම ජාතික පූජ්ය පඤ්ඤාකර හිමියන් ප්රමුඛ භික්ෂූන් වහන්සේ 13 නම අද පෙරවරුවේ දළදා සමිඳුන් වැඳපුදා ගැනීමෙන් අනතුරුව මෙම පාගමන ආරම්භ කළහ.
දියවඩන නිලමේ ප්රදීප් නිලංග දෑල මහතා විසින් දළදා මාලිගාවේදී භික්ෂූන් වහන්සේලා පිළිගත් අතර, මහා සංඝරත්නය සෙත් පිරිත් සජ්ඣායනා කරමින් පාගමනේ නිරත පිරිසට ආශිර්වාද කළහ. මෙම සාම චාරිකාව වෙනුවෙන් පහළ කඩුගන්නාව ප්රදේශයේදී පූජ්ය පඤ්ඤාකර හිමියන් විසින් විශේෂ සමරු පැළයක් ද රෝපණය කරන ලදී.
සාම පාගමනේ වඩින භික්ෂූන් වහන්සේලා මෙන්ම සැදැහැවතුන්ගේ විශේෂ අවධානයට ලක් වූ ‘අලෝකා’ සුනඛයා දැකබලා ගැනීමටත්, පූජ්ය පඤ්ඤාකර හිමියන්ට ගෞරව දැක්වීමටත් මාර්ගය දෙපස විශාල පිරිසක් රැස්ව සිටියහ. බෞද්ධ සැදැහැවතුන් මාර්ගය පුරා පාවඩ එළමින්, ජලය ඉසිමින් සහ කෙසෙල් කොළ අතුරමින් භික්ෂූන් වහන්සේලාට ගමන් කිරීමට ඉඩ සලසා දී තිබූ අතර, මුළු කිලෝමීටර් 25ක දුර පුරාම මහත් සැදැහැවත් බවක් දක්නට ලැබුණි.
