කෘතිම බුද්ධිය (AI) මත පමණට වඩා යැපීම මිනිසාගේ ස්වාධීන චින්තන ශක්තිය පිරිහීමට හේතු විය හැකි බව වියට්නාම ජාතික පූජ්ය පඤ්ඤාකර හිමියෝ පවසති. කැලණිය රජමහා විහාරයේ පැවති ධර්ම දේශනයකදී උන්වහන්සේ පෙන්වා දුන්නේ වර්තමානයේ සිසුන් ඇතුළු බොහෝ පිරිසක් ලිපි ලේඛන සකස් කිරීමේ සිට මූලික ජීවන තීරණ ගැනීම දක්වා AI තාක්ෂණය භාවිතා කිරීමට හුරුවීම නිසා මිනිස් මොළය වෙහෙසවීම ක්රමයෙන් අත්හැර දමා ඇති බවයි. මෙය මුවහත් පිහියක් වැනි බලවත් මෙවලමක් බැවින් එය වගකීම් සහගතව සහ අත්යවශ්ය අවස්ථාවලදී පමණක් පරිහරණය කිරීමේ වැදගත්කම උන්වහන්සේ අවධාරණය කළහ.
තාක්ෂණයට වහල් නොවී ඕනෑම ගැටලුවකදී ප්රථමයෙන් තමන්ගේම බුද්ධිය මෙහෙයවා විසඳුම් සෙවිය යුතු බව පෙන්වා දුන් උන්වහන්සේ, තාක්ෂණය මතම යැපීම දිගින් දිගටම සිදු වුවහොත් මිනිසා රොබෝවරයෙකු බවට පත්වීම වැළැක්විය නොහැකි බව ද සඳහන් කළහ. AI තාක්ෂණය නිසි ලෙස කළමනාකරණය කරන්නේ නම් එය ප්රයෝජනවත් මෙවලමක් වුවද, නොසැලකිලිමත් ලෙස භාවිත කිරීම ජීවිතයට හානිදායක විය හැකි බව උන්වහන්සේ වැඩිදුරටත් සිහිපත් කළහ.
