විවාදයට තුඩුදුන් ත්රස්තවාදය වැළැක්වීමේ පනත (PTA) ඉතා කෙටි කාලසීමාවක් තුළදී සම්පූර්ණයෙන්ම අහෝසි කිරීමට කටයුතු කරන බව මහජන ආරක්ෂක සහ පාර්ලිමේන්තු කටයුතු අමාත්ය ආනන්ද විජේපාල මහතා අද (09) පාර්ලිමේන්තුවේදී විශේෂ ප්රකාශයක් කරමින් සපථ කළේය.
අද දින පාර්ලිමේන්තු සභාවාරයේදී අදහස් දක්වමින් අමාත්යවරයා අවධාරණය කළේ ත්රස්තවාදය වැළැක්වීමේ පනත අහෝසි කිරීම සඳහා අවශ්ය කරන සියලුම මූලික කටයුතු සහ ප්රතිපාදන මේ වන විටත් රජය සූදානම් කර ඇති බවයි. වත්මන් රජය කෙරෙහි ජනතාව සතු පූර්ණ විශ්වාසය මත ඉතා පැහැදිලි මහජන බලයක් ලැබී ඇති බැවින්, ජනතාව පීඩාවට පත් කරන මර්දනකාරී පනත්, අණපනත් හෝ දැඩි නීති රීති යොදාගනිමින් රට පාලනය කිරීමේ කිසිදු අවශ්යතාවයක් රජයට නොමැති බව ද ඔහු කියා සිටියේය.
විපක්ෂයේ මන්ත්රීවරුන් විසින් මතු කරන ලද ප්රශ්න කිරීම්වලට සෘජුව පිළිතුරු දෙමින් අමාත්යවරයා මෙසේ ද පැවසීය: “මෙතන ගරු මන්ත්රීවරු කිහිපදෙනෙක්ම ත්රස්තවාදය වැළැක්වීමේ පනත ගැන දිගින් දිගටම කතා කළා. මම වගකීමෙන් කියනවා අපි අනිවාර්යයෙන්ම ත්රස්තවාදය වැළැක්වීමේ පනත සම්පූර්ණයෙන්ම අහෝසි කරනවා. මේ වෙනකොට ගරු අධිකරණ ඇමතිතුමා සභාවට ප්රකාශ කළා වගේම, මේ පනත අහෝසි කිරීම සඳහා වන සියලුම නීතිමය කටයුතු අපි සූදානම් කරලයි තියෙන්නේ. ඒ නිසා ඉතාමත් කෙටි කාලයක් ඇතුළත මේ පනත අහෝසි කරන්න අපිට පුළුවන්. අපි මේ වගේ මර්දන නීති සහ අණපනත් ඉස්සරහට දාගෙන ආණ්ඩු කරන්න සූදානම් නැහැ. මොකද අපිට ඒවට වඩා ශක්තිමත් හොඳ මහජන බලයක් රට ඇතුළේ තියෙනවා.”
