රක්ෂණ ඔප්පු (Insurance Policies) ඉතුරුම් උපකරණ ලෙස භාවිතා කරමින් ඇතැම් පුද්ගලයන් සිදුකරන බදු පැහැර හැරීම් වැළැක්වීම සඳහා නව දැඩි රෙගුලාසි හඳුන්වා දෙන බව මුදල් හා ක්රමසම්පාදන නියෝජ්ය අමාත්ය අනිල් ජයන්ත මහතා නිවේදනය කරයි.
බොහෝ දෙනෙකු සාමාන්ය බැංකු ඉතුරුම් ගිණුම්වල මුදල් තැන්පත් කිරීම වෙනුවට, රක්ෂණ ඔප්පු හරහා මුදල් ආයෝජනය කරමින් බදු දැලෙන් රහසේ රිංගා යාමට උත්සාහ කරන බවට මුදල් අමාත්යාංශය වෙත තොරතුරු සහ පැමිණිලි රැසක් ලැබී ඇති බව ඔහු පවසයි. මෙම තත්ත්වය සැලකිල්ලට ගනිමින්, රක්ෂණ සැලසුම් උපයෝගී කරගෙන සිදුකරන බදු පැහැර හැරීම් සම්පූර්ණයෙන්ම වැළැක්වීම සඳහා බදු එකතු කිරීමේ නීති සහ අදාළ රෙගුලාසිවල විශේෂ සංශෝධන දැනටමත් ක්රියාත්මක කර ඇති බව නියෝජ්ය අමාත්යවරයා පෙන්වා දෙයි. රජයේ ආදායම් මාර්ගවල පවතින බදු කාන්දුවීම් (Tax Leakages) අවම කිරීම රටේ ආර්ථික ස්ථාවරත්වයට අත්යවශ්ය කරුණක් වන අතර, බදු පදනම පුළුල් කර ජාතික බදු එකතු කිරීමේ ක්රමය වඩාත් විනිවිදභාවයකින් යුතුව ශක්තිමත් කිරීම මෙම නව නීති සංශෝධනවල මූලික අරමුණ බව ද අනිල් ජයන්ත මහතා වැඩිදුරටත් අවධාරණය කළේය.
