ලෝකයේ කිසිදු පුද්ගලයෙකුට, ආයතනයකට හෝ ඇමෙරිකානු රජයට පවා භාවිත කිරීමට නොහැකි තරම් අතිශය අවදානම් සහගත මට්ටමක පවතින බව පවසමින් Anthropic සමාගමේ නවතම සහ දියුණුම කෘතිම බුද්ධි (AI) මාදිලි ද්විත්වය තහනම් කිරීමට ට්රම්ප් පරිපාලනය පියවර ගෙන තිබේ. ඒ අනුව, ‘Mythos 5’ සහ ‘Fable 5’ යන AI මාදිලි සඳහා පනවා ඇති අපනයන පාලන සීමාවන් (Export controls) පිළිබඳව ඇමෙරිකානු වාණිජ ලේකම් හොවාර්ඩ් ලුට්නික් විසින් Anthropic සමාගමේ ප්රධාන විධායක නිලධාරී ඩාරියෝ අමෝඩෙයි වෙත නිල වශයෙන් දැනුම් දී ඇත.
පාලනාධිකාරී නිලධාරියෙකුට අනුව, වෙනත් සමාගමක් විසින් ‘Mythos’ මාදිලියේ ආරක්ෂක සීමාවන් බිඳ දැමූ බවට (Jailbroken) කළ ප්රකාශයක් හේතුවෙන් ජාතික ආරක්ෂාවට එල්ල වූ දැඩි තර්ජනයක් මුල් කරගනිමින් මෙම තීරණය ගෙන තිබේ. මෙම මාදිලි නිකුත් කිරීම ප්රමාද කරන ලෙස රජය කළ ඉල්ලීම සමාගම ප්රතික්ෂේප කිරීමෙන් පසුව මෙම දැඩි පියවර ගෙන ඇත. මේ වන විටත් මෙම AI මාදිලි ආරක්ෂක අමාත්යාංශය (Pentagon) විසින් කළු ලේඛනගත කර ඇති අතර, දැන් වාණිජ දෙපාර්තමේන්තුව මඟින් විදේශීය භාවිතය ද තහනම් කර තිබේ.
මෙම සංකීර්ණ බලපත්ර ගැටලුවලට මුහුණ දෙනවා වෙනුවට Anthropic සමාගම ඊයේ (සිකුරාදා) රාත්රියේ සිට ලොව පුරා සිටින සියලුම පාරිභෝගිකයන් සඳහා මෙහි ප්රවේශය සම්පූර්ණයෙන්ම අත්හිටුවීමට පියවර ගත්තේය. සමාගම පවසන්නේ මෙය “මතභේදාත්මක තත්ත්වයක්” (Misunderstanding) වන අතර එය විසඳීමට කටයුතු කරමින් සිටින බවයි. රජය විසින් සිය ආරක්ෂක පියවරයන් ශක්තිමත් කරන තෙක් සති කිහිපයකට මෙම තහනම ක්රියාත්මක වන බවත්, ජනාධිපති ට්රම්ප්ට AI කර්මාන්තයට හානියක් කිරීමට අවශ්යතාවක් නොමැති බවත් රජයේ නිලධාරියා වැඩිදුරටත් අවධාරණය කළේය.
