දේශපාලන බලය අයුතු ලෙස භාවිත කරමින් ඉඩම් අත්පත් කර ගැනීම හේතුවෙන් නැගෙනහිර පළාත තුළ බරපතළ ගැටලු රැසක් මතුව ඇති බවත්, තවදුරටත් ඊට ඉඩ දිය නොහැකි බවත් ජනාධිපති අනුර කුමාර දිසානායක මහතා අවධාරණය කරයි. මේ අනුව, නැගෙනහිර පළාතේ ඉඩම් ආරක්ෂා කර ගැනීම වෙනුවෙන් නියෝජ්ය පොලිස්පතිවරයෙකුගේ (DIG) සෘජු ප්රධානත්වයෙන් යුත් විශේෂ කමිටුවක් පත් කිරීමට පියවර ගන්නා බව ජනාධිපතිවරයා ප්රකාශ කළේය.
ජනාධිපති අනුර කුමාර දිසානායක මහතා මෙම අදහස් පළ කළේ අම්පාර දිස්ත්රික් ලේකම් කාර්යාලයේදී පැවැත්වුණු අම්පාර දිස්ත්රික් විශේෂ සම්බන්ධීකරණ කමිටු රැස්වීමට එක් වෙමිනි.
සමුද්ර ඛාදනය හේතුවෙන් දැඩි ලෙස විනාශයට වෙමින් පවතින නැගෙනහිර වෙරළ තීරය ආරක්ෂා කර ගැනීම පිළිබඳව ජනාධිපතිවරයා මෙහිදී විශේෂ අවධානයක් යොමු කළේය. අදාළ වෙරළ තීරය ආරක්ෂා කර ගන්නා අතරම, එම කලාපය තුළ සංචාරක කර්මාන්තය වඩාත් ක්රමවත්ව ප්රවර්ධනය කිරීම සඳහා වන නිසි සැලැස්මක් කඩිනමින් සකස් කරන ලෙස ඒ මහතා නිලධාරීන්ට නියෝග කළේය.
වෙරළ ඛාදනය වැළැක්වීම සඳහා සාම්ප්රදායික ලෙස ගල්වැටි දැමීම ප්රායෝගික විසඳුමක් නොවන බව පෙන්වා දුන් ජනාධිපතිවරයා, ඔලුවිල් වරාය මෙන්ම ඒ ආශ්රිත ධීවර වරාය පිළිබඳව ද දැඩි අවධානයක් යොමු කළේය. ඒ අනුව මෙම සමස්ත ගැටලුවට ස්ථීර මෙන්ම විද්යාත්මක ක්රමවේදයක් සහිත විසඳුමක් ලබා දීම සඳහා කඩිනම් අධ්යයනයක් සිදු කරන ලෙස ද ජනාධිපතිවරයා මෙහිදී නිලධාරීන්ට වැඩිදුරටත් උපදෙස් ලබා දුන්නේය.
