පසුගිය පාලන සමයන්හිදී අමාත්‍යවරුන් වෙනුවෙන් කොළඹින් ලබා දී තිබූ සියලු නිල නිවාස වෙන්දේසි කර, ඉන් ලැබෙන අරමුදල් මහජනතාවට සෘජුවම හිතකර සංවර්ධන ව්‍යාපෘති සඳහා යෙදවීමට රජය පියවර ගෙන ඇති බව ජනාධිපති අනුර කුමාර දිසානායක මහතා පවසයි. ඉබ්බාගමුව ප්‍රදේශයේ පැවැති ජන රැලියක් අමතමින් ජනාධිපතිවරයා අවධාරණය කළේ, දේශපාලනය යනු මහජන දේපළ හා රාජ්‍ය ධනය නාස්ති කිරීම නොව සැබෑ ජනතා සේවයක් බවට පත් කරමින් වත්මන් පාලනය විසින් මෙරට දේශපාලන සංස්කෘතියේ ඓතිහාසික හා තීරණාත්මක පරිවර්තනයක් සිදු කර ඇති බවයි.
අතීතයේ පැවැති අමාත්‍ය නිල නිවාස, වාහන පෙළපාළි, දැවැන්ත ආරක්ෂක රැකවල් මෙන්ම නිලධාරීන්ගේ පෞද්ගලික විදුලි හා ජල බිල්පත් ගෙවීම් ඇතුළු සියලු අතිරේක වරප්‍රසාද වත්මන් රජය යටතේ සහමුලින්ම අහෝසි කර ඇති අතර, අමාත්‍ය නිවාස විකිණීම සඳහා වන පුවත්පත් දැන්වීම් ද මේ වන විටත් පළ කර තිබේ. මීට අමතරව, වසර පහක කාලයක් පාර්ලිමේන්තුව නියෝජනය කළ මන්ත්‍රීවරුන්ට හිමිව තිබූ විශ්‍රාම වැටුප් ක්‍රමය මෙන්ම හිටපු ජනාධිපතිවරුන් වෙනුවෙන් වෙන් කර තිබූ අධික නිල නිවාස, කාර්ය මණ්ඩල සහ ආරක්ෂක වරප්‍රසාද ද පාර්ලිමේන්තු පනතක් මඟින් අහෝසි කිරීමට පියවර ගෙන ඇති බව හෙතෙම වැඩිදුරටත් මතක් කර දුන්නේය.
කැබිනට් අමාත්‍ය ධුර සංඛ්‍යාව 25කට සීමා කරමින් රාජ්‍ය අමාත්‍ය ධුර සම්පූර්ණයෙන්ම අහෝසි කිරීමටත්, රාජ්‍ය සේවකයින්ට සහ පොලිස් නිලධාරීන්ට අනිසි දේශපාලන බලපෑම් එල්ල නොවන සාමකාමී පරිසරයක් ස්ථාපිත කිරීමටත් රජය ගත් පියවර තුළින් රාජ්‍ය තාන්ත්‍රික මෙන්ම ආර්ථිකමය වශයෙන් ද විශාල නාස්තියක් වැළකී යනු ඇතැයි අපේක්ෂා කෙරේ. ජනතාව වෙත ලබා දුන් පොරොන්දු ප්‍රකාරව මෙරට දේශපාලනික හා රාජ්‍ය පරිපාලන ව්‍යුහය යහපත් මගකට යොමු කිරීමේ මෙම දීර්ඝකාලීන ගමන නොනවත්වාම ඉදිරියට ගෙන යන බව ජනාධිපතිවරයා තහවුරු කරයි.
