රජරට මහා වාරි පද්ධතියට එකතු වීමට නියමිත පහළ මල්වතුඔය බහුකාර්ය සංවර්ධන ව්යාපෘතියේ ඉදිකිරීම් කටයුතු සොයා බැලීම සඳහා ජනාධිපති අනුර කුමාර දිසානායක මහතා අද (29) එහි නිරීක්ෂණ චාරිකාවක නිරත විය. මීට වසර 10කට පෙර ආරම්භ කර විවිධ හේතු නිසා අතරමග නතර වී තිබූ මෙම ව්යාපෘතිය, වත්මන් රජය යටතේ යළි ආරම්භ කරමින් 2026 වර්ෂය සඳහා රුපියල් මිලියන 5000ක ප්රතිපාදන වෙන් කර ඇත. සම්පූර්ණයෙන් දේශීය අරමුදල් මත ක්රියාත්මක වන මෙය, 2029 වසරේ අගභාගයේදී අවසන් කිරීමට නියමිතය.
උතුරු මැද පළාතේ අනුරාධපුර දිස්ත්රික්කය සහ උතුරු පළාතේ වවුනියාව දිස්ත්රික්කය යා කරමින් තන්තිරිමලේ බෝගොඩදී මල්වතුඔය හරස් කර ඉදිකෙරෙන මෙම ජලාශය අක්කර අඩි 169,400ක ජල ධාරිතාවකින් යුක්ත වන අතර, ඉදිවීමෙන් පසු එය උතුරු මැද පළාතේ විශාලතම ජලාශය බවට පත්වනු ඇත. අනුරාධපුර, වවුනියාව සහ මන්නාරම දිස්ත්රික්කවල පානීය ජල ගැටලුවට විසඳුම් ලබා දීම, යල මහ දෙකන්නයේම කුඹුරු අක්කර 40,000ක් අස්වැද්දීමට පහසුකම් සැලසීම, ජල විදුලි උත්පාදනය සහ ගංවතුර පාලනය ඇතුළු බහුකාර්ය අරමුණු රැසක් මෙමගින් අපේක්ෂා කෙරේ.
මෙහිදී ව්යාපෘතියේ ප්රගතිය විමසා බැලූ ජනාධිපතිවරයා, ව්යාපෘතිය හේතුවෙන් අවතැන් වන පවුල් 315 සඳහා ඉඩමක විදුලිය හා පානීය ජල පහසුකම් සහිත නිවෙසක් ලබා දීමටත්, එම ඉඩම් සූර්ය බලශක්තියෙන් ක්රියාත්මක උස්සාන වාරිමාර්ග මඟින් සුහුරු කෘෂිකාර්මික වගාවන් සඳහා යොමු කිරීමටත් උපදෙස් දුන්නේය. කිලෝමීටර් 3.4ක ප්රධාන බැම්මේ ඉදිකිරීම් මේ වන විට 60%ක් පමණ අවසන් කර ඇති අතර, ඓතිහාසික තන්තිරිමලය රාජමහා විහාරාධිපති පූජ්ය තන්තිරිමලේ චන්දරතන නාහිමියන් ඇතුළු පිරිසක්ද මෙම අවස්ථාවට එක්ව සිටියහ.
