ඇමරිකානු ජනාධිපති ඩොනල්ඩ් ට්රම්ප් ලැබූ විශාල නීතිමය ජයග්රහණයක් සනිටුහන් කරමින්, වෙනිසියුලානු සංක්රමණිකයන් පිටුවහල් කිරීමට අදාළව ඔහුගේ පරිපාලන නිලධාරීන්ට එරෙහිව පැවති පරීක්ෂණයක් වහාම නතර කරන ලෙස ඇමරිකානු අභියාචනාධිකරණය නියෝග කර තිබේ. වෙනිසියුලානු වැසියන් පිටුවහල් කිරීම නතර කරන ලෙස අධිකරණය ලබා දී තිබූ නියෝගයක් ට්රම්ප් පරිපාලනය විසින් හිතාමතාම උල්ලංඝනය කර ඇත්දැයි සොයා බැලීමට දිස්ත්රික් විනිසුරු ජේම්ස් බෝස්බර්ග් (James Boasberg) විසින් ආරම්භ කර තිබූ පරීක්ෂණය මෙලෙස අත්හිටුවා ඇත.
වොෂින්ටන් ඩී.සී. හි අභියාචනාධිකරණ විනිසුරු මඩුල්ලේ බහුතර මතය වූයේ, විධායක ශාඛාවේ ඉහළ නිලධාරීන්ගෙන් දිවුරුම් ප්රකාශ ලබා ගැනීමට විනිසුරුවරයා ගත් උත්සාහය “විධායකයේ ස්වාධීනත්වයට” (Executive Autonomy) බාධා කිරීමක් බවයි. ජාතික ආරක්ෂාව සහ රාජ්ය තාන්ත්රික කරුණු සම්බන්ධයෙන් රජය ගන්නා තීරණ පිළිබඳව මෙලෙස සෘජුව ප්රශ්න කිරීම අධිකරණ බලය අයුතු ලෙස භාවිතා කිරීමක් බව විනිසුරු නියෝමි රාඕ (Neomi Rao) සිය තීන්දුවේ සඳහන් කළාය.
මෙම නීතිමය අර්බුදය හටගත්තේ 2025 මාර්තු මාසයේදී වෙනිසියුලානු සංක්රමණිකයන් රැගත් ගුවන් යානා යළි හරවා එවන ලෙස බෝස්බර්ග් විනිසුරුවරයා ලබා දුන් නියෝගය පරිපාලනය විසින් නොසලකා හැර ඇති බවට එල්ල වූ චෝදනා සමඟය. මෙම තීන්දුවත් සමඟ, සංක්රමණික ප්රතිපත්ති ක්රියාත්මක කිරීමේදී ජනාධිපතිවරයා සතු බලතල තවදුරටත් තහවුරු වී ඇති බව නීති විශ්ලේෂකයින් පෙන්වා දෙති.
