අපරාධ පරීක්ෂණ දෙපාර්තමේන්තුව (CID) විසින් තමන්ව ත්රස්තවාදය වැළැක්වීමේ පනත යටතේ රඳවා තබා ගැනීම සඳහා නිකුත් කර ඇති රැඳවුම් නියෝගය බලරහිත කරන ලෙස ඉල්ලා රාජ්ය බුද්ධි සේවයේ හිටපු අධ්යක්ෂ සුරේෂ් සලේ මහතා ඉදිරිපත් කළ පෙත්සම සලකා බැලීම ජූලි මස 10 වනදා දක්වා අභියාචනාධිකරණය විසින් කල් තබන ලදී.
මෙම පෙත්සම අභියාචනාධිකරණ සභාපති විනිසුරු රෝහාන්ත අබේසූරිය සහ විනිසුරු ප්රියන්ත ප්රනාන්දු යන මහත්වරුන්ගෙන් සමන්විත විනිසුරු මඩුල්ල ඉදිරියේ අද (11) කැඳවනු ලැබීය.
පෙත්සම්කරු වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා අධිකරණය හමුවේ කරුණු දක්වමින් අයි.එස්.අයි.එස් (ISIS) සංවිධානයේ දෘෂ්ටිවාදය ශ්රී ලංකාව තුළ ක්රියාත්මක වූ ආකාරය සහ ශ්රී ලාංකිකයින් 39 දෙනෙකු සිරියාවට ගොස් ඊට සම්බන්ධ වී ඇති බව පැවසීය. මාවනැල්ල බුදු පිළිමවලට පහරදීමේ සිද්ධියේදී විදේශීය අන්තවාදී කල්ලියක මැදිහත්වීමක් ඇතැයි තොරතුරු හෙළි වුවද, එවක CID අධ්යක්ෂවරයාව සිටි ශානි අබේසේකර මහතා ඒ පිළිබඳ නිසි විමර්ශන සිදු නොකළ බව නීතිඥවරයා චෝදනා කළේය.
සහරාන් හෂීම් ඇතුළු අන්තවාදීන්ගේ ක්රියාකාරකම් පිළිබඳ වාර්තා 97ක් සහ සැකකරුවන් 129 දෙනෙකුගේ ලැයිස්තුවක් රාජ්ය බුද්ධි සේවය විසින් පොලිස්පතිවරයා වෙත යොමු කර තිබියදීත්, ශානි අබේසේකර සහ රවි සෙනෙවිරත්න යන නිලධාරීන් එම තොරතුරු සම්බන්ධයෙන් නිසි පියවර නොගත් බව ඔහු පෙන්වා දුන්නේය. 2019 අප්රේල් 4 වනදා ඉන්දීය බුද්ධි අංශ මගින් පාස්කු ප්රහාරයක් පිළිබඳව ලබා දුන් අනතුරු ඇඟවීම් සම්බන්ධයෙන්ද වගකිවයුතු නිලධාරීන් නිසි ලෙස කටයුතු නොකළ බවත්, කිසිදු පරීක්ෂණ වාර්තාවකින් සුරේෂ් සලේ මහතා මෙම ප්රහාරයට සම්බන්ධ බවට අනාවරණ වී නොමැති බවත් ඔහු අවධාරණය කළේය.
හිටපු මහාධිකරණ විනිසුරු ජයකී ද අල්විස් මහත්මියගේ කමිටුව විසින් පාස්කු ප්රහාරය වළක්වා ගැනීමට කටයුතු නොකිරීම සම්බන්ධයෙන් ශානි අබේසේකර සහ රවි සෙනෙවිරත්න යන අයට එරෙහිව නීතිමය පියවර ගන්නා ලෙස නිර්දේශ කර තිබූ බවද පෙත්සම්කරු වෙනුවෙන් පෙනී සිටි නීතිඥවරයා අධිකරණයේදී සඳහන් කළේය. ඉන් අනතුරුව පෙත්සමට අදාළ වැඩිදුර කරුණු දැක්වීම් ජුලි මස 10 වනදා දක්වා කල්තැබීමට අභියාචනාධිකරණය තීන්දු කළේය.
