වෙළඳපොළේ පවතින අනෙකුත් සමාගම්වල ස්මාර්ට් කණ්ණාඩි මඟින් පරිශීලකයින්ගේ පෞද්ගලිකත්වයට සිදුවන හානි පිළිබඳව ලොව පුරා දැඩි කතාබහක් නිර්මාණය වී ඇති පසුබිමක, ඇපල් සමාගම විසින් 2027 වසරේදී නව ස්මාර්ට් කණ්ණාඩියක් වෙළඳපොළට නිකුත් කිරීමට සැලසුම් කරමින් සිටින බව විදෙස් වාර්තා සඳහන් කරයි. මෙටා සමාගමේ ස්මාර්ට් කණ්ණාඩි භාවිත කරමින් අන් අයට නොදැනෙන සේ හොර රහසේ ඡායාරූප සහ වීඩියෝ ලබාගැනීමට හැකිවීම නිසා සමාජය තුළ විශාල බියක් සහ විරෝධයක් හටගෙන ඇති අතර, ඇතැම් පිරිස් මේවා අන් අය අපහසුතාවයට පත් කරන උපාංග ලෙසද හඳුන්වා දී ඇත. මෙම තත්ත්වය යටතේ ඇපල් සමාගම තම නව නිෂ්පාදනයේදී පෞද්ගලිකත්වය ආරක්ෂා කිරීමට උපරිම ප්රමුඛතාවයක් දීමට තීරණය කර තිබේ.
බ්ලූම්බර්ග් (Bloomberg) වාර්තාවලට අනුව, මෙම ගැටලුවලට විසඳුම් ලෙස ඇපල් සමාගම පහත විශේෂාංග හඳුන්වා දීමට බලාපොරොත්තු වෙයි:
පරිශීලක දත්ත කණ්ණාඩියෙන් පිටතට නොයන නිසා ඒවා 100%ක්ම ආරක්ෂිත වන අතර, දත්ත කිසිදු සර්වර් (Server) එකකට නොයවා උපාංගය තුළම පමණක් සකස් කෙරේ.පරිශීලකයන්ගේ පෞද්ගලික පටිගත කිරීම් ඇපල් සමාගමේ කෘත්රිම බුද්ධි මාදිලි පුහුණු කිරීම සඳහා කිසිසේත්ම යොදා නොගනී.
ඡායාරූප හෝ වීඩියෝ ගැනීමට නොහැකි, අවට ඇති දේවල් හඳුනාගැනීමට පමණක් උදව් වන විශේෂ සෙන්සර් සහිත කැමරා පද්ධතියක් මෙයට ඇතුළත් විය හැක.මෙම නව උපාංගය 2027 ජූනි මාසයේදී පැවැත්වෙන WWDC සමුළුවේදී ප්රකාශයට පත්කර, එම වසර අගදී වෙළඳපොළට නිකුත් කරනු ඇතැයි අපේක්ෂා කෙරේ. තාක්ෂණික දියුණුවත් සමඟ පුද්ගලිකත්වයට එල්ල වන අභියෝග මැඩලීම සඳහා විශාල තාක්ෂණික සමාගම් මෙպරිදි ආරක්ෂිත ක්රමවේද අනුගමනය කිරීම ජාත්යන්තර මට්ටමින් දැඩි ඇගයීමට ලක්ව තිබේ.
