ස්වාභාවික ආහාරපානවලින් ඈත්ව කෘත්රිම ආහාරපානවලට යොමු වීම නිසා බඩවැල් ආශ්රිත රෝගීන් වාර්තා වීම ඉහළ ගොස් ඇති බව කුලියාපිටිය ශික්ෂණ රෝහලේ ආමාශ, ආන්ත්රික සහ අක්මා විශේෂඥ වෛද්ය සුපුන් කුලතුංග මහතා පවසයි. සෞඛ්ය ප්රවර්ධන කාර්යාංශයේ පැවති ශ්රී ලංකා ආමාශ ආන්ත්ර විද්යා සංගමයේ මාධ්ය හමුවකට එක්වෙමින් ඒ මහතා මේ බව (12) දින ප්රකාශ කළේය.
බඩවැලෙහි තුවාල පවතින බවට මුල් අවස්ථාවේදීම හඳුනාගතහොත් ප්රතිකාර කර රෝගය යටපත් කළ හැකි බවත්, මෙම තුවාල දිගුකාලීනව පැවතීම මඟින් පිළිකා තත්ත්වයන් හට ගත හැකි බවත් වෛද්යවරයා පෙන්වා දුන්නේය. විශේෂයෙන්ම ගුද මාර්ගය ආශ්රිත පිළිකා මෙරටින් වැඩිමයෙන් දෙවැන්නට වාර්තා වන පිළිකාව බවට පත්ව තිබේ. බඩවැල් ආශ්රිත රෝග හට ගැනීම සඳහා මානසික ආතතිය, බඩවැල් ප්රදාහය, ඇතැම් ඖෂධ භාවිතය, පිත අවශෝෂණයේ දුර්වලතා සහ ආසාදන තත්ත්වයන්ද හේතු වන බව හෙතෙම සඳහන් කළේය.
මල සමඟ රුධිරය පිටවීම, හේතුවක් නොමැතිව බර අඩු වීම, රක්තහීනතාව, දිගින් දිගටම පවතින උදර වේදනාව, වමනය, උදරය අසාමාන්ය ලෙස පිම්බීම සහ මලපහ කිරීමේ පුරුද්දේ වෙනස් වීම වැනි කාරණා ගුද මාර්ගය ආශ්රිත පිළිකා තත්ත්වයක මූලික ලක්ෂණ විය හැකිය. දිනපතා තන්තු බහුල ආහාර ගැනීම, පලතුරු යුෂ වෙනුවට සම්පූර්ණයෙන්ම පලතුර ආහාරයට ගැනීම, අඩුයෙන් පිරිපහදු කළ ධාන්ය ගැනීම, ප්රමාණවත් ලෙස දියර පානය සහ ශාරීරිකව ක්රියාශීලි වීම මඟින් මෙම රෝග වළක්වා ගත හැකි බව වෛද්යවරයා වැඩිදුරටත් අවධාරණය කළේය.
