2025 නොවැම්බර් මාසයේදී ශ්රී ලංකාවට බලපෑ ‘ඩිට්වා’ (Ditwah) සුළි කුණාටුවෙන් පීඩාවට පත් වූ නුවරඑළිය සහ බදුල්ල දිස්ත්රික්කවල එළවළු නිෂ්පාදන පද්ධති යථා තත්ත්වයට පත් කිරීම සහ වැඩිදියුණු කිරීම සඳහා ඔස්ට්රේලියානු රජය සහ එක්සත් ජාතීන්ගේ ආහාර හා කෘෂිකර්ම සංවිධානය (FAO) විසින් ඕස්ට්රේලියානු ඩොලර් මිලියන 2ක ව්යාපෘතියක් දියත් කර තිබේ. කෘෂිකර්ම, පශු සම්පත්, ඉඩම් සහ වාරිමාර්ග අමාත්යාංශය සමඟ එක්ව මෙම වැඩසටහන ක්රියාත්මක වේ.
සුළි කුණාටුවෙන් අස්වනු, බීජ තොග සහ නිෂ්පාදන උපකරණ අහිමි වූ සුළු පරිමාණ ගොවීන් 2,400කට වැඩි පිරිසකට මෙම 12 මසක ව්යාපෘතිය හරහා සෘජු ප්රතිලාභ ලැබෙනු ඇත. මෙහි ප්රධාන අරමුණු වන්නේ දේශගුණික විපර්යාසවලට ඔරොත්තු දෙන එළවළු නිෂ්පාදන පද්ධති ස්ථාපිත කිරීම, කාන්තා ගොවීන් සවිබල ගැන්වීම සහ ආබාධිත පුද්ගලයින් සඳහා සහාය ලබා දීමයි.
නුවරඑළිය සහ බදුල්ල දිස්ත්රික්කවල සියලු දෙනාට ප්රවේශ විය හැකි සහ ඇතුළත් වන පරිදි තවාන් 6ක් ස්ථාපිත කිරීම.
බෝංචි සහ අර්තාපල් සඳහා ගොවීන් විසින්ම පවත්වාගෙන යනු ලබන බීජ පද්ධති ප්රතිෂ්ඨාපනය කිරීම.
දේශගුණික හිතකාමී කෘෂිකාර්මික පිළිවෙත් (CSGAP) සම්බන්ධයෙන් ගොවීන් පුහුණු කිරීම සහ කුඩා පරිමාණ යන්ත්රෝපකරණ ලබා දීම.
කාන්තාවන් විසින් මෙහෙයවන තවාන් පද්ධති ශක්තිමත් කිරීම සහ වෙළෙඳපොළ සබඳතා වර්ධනය කිරීම.
මෙම ව්යාපෘතිය මගින් එළවළු නිෂ්පාදනය ස්ථාවර කිරීම, පවුල්වල ආහාර සුරක්ෂිතතාව සහ පෝෂණය ඉහළ නැංවීම සහ ආනයනික බීජ මත ඇති යැපීම අඩු කිරීමට අපේක්ෂා කෙරේ. මෙම ගිවිසුම සඳහා ශ්රී ලංකාවේ ඔස්ට්රේලියානු මහ කොමසාරිස් මැතිව් ඩක්වර්ත් සහ FAO නියෝජිත විම්ලේන්ද්ර ශරන් යන මහත්වරුන් අත්සන් තැබූ අතර, කෘෂිකර්ම අමාත්ය කේ. ඩී. ලාල් කාන්ත මහතාගේ ප්රධානත්වයෙන් එම අවස්ථාව පැවැත්විණි.
