ඕස්ට්රේලියාව හඳුන්වා දුන් වයස අවුරුදු 16න් පහළ සමාජ මාධ්ය තහනම ශ්රී ලංකාවේ නීති සම්පාදකයින් සහ අග්රාමාත්යවරයා දැඩිව අවධානයට ගත යුතු පාඩමක් උගන්වා ඇතැයි ආචාර්ය සංජන හත්තොටුව මහතා පවසයි. වෛද්ය සඟරාවක් (BMJ) කළ පර්යේෂණයකට අනුව, ඕස්ට්රේලියාවේ තහනම ක්රියාත්මක වී මාස තුනකට පසුවත් 16න් පහළ දරුවන්ගෙන් 85%කට වඩා වැඩි පිරිසක් තවදුරටත් ව්යාජ උපන් දින ඇතුළත් කරමින් එම සේවාවන් රහසේම භාවිත කරති. ශ්රී ලංකාවට වඩා සම්පත් ඇති රටකට පවා මෙය පාලනය කළ නොහැකි නම්, ශ්රී ලංකාව තුළ එය සාර්ථක වනු ඇතැයි සිතීම ප්රායෝගික නොවන බව ඔහු පෙන්වා දෙයි.
බීබීසී සිංහල සේවය සමඟ අදහස් දක්වමින් ඔහු පෙන්වා දෙන්නේ, මෙවැනි තහනමක් ක්රියාත්මක කිරීමට නම් දරුවන්ගේ පමණක් නොව රටේ සමස්ත පුරවැසියන්ගේම ජාතික හැඳුනුම්පත, ගමන් බලපත්රය වැනි සංවේදී තොරතුරු සමාජ මාධ්ය ජාල වෙත ලබා දී වයස තහවුරු කළ යුතු බවයි. මින් පෙර දූෂිත අයුරින් සම්මත කරගත් මාර්ගගත සුරක්ෂිතතාව පිළිබඳ පනත (OSA) මෙන්ම, ‘ළමා ආරක්ෂාව’ නමැති ලේබලය යටතේ රජය උත්සාහ කරන්නේ සිවිල් වැසියන්ගේ අදහස් ප්රකාශ කිරීමේ අයිතිය මර්දනය කිරීමට සහ දේශපාලනික විවේචන නිරීක්ෂණය කිරීමට හැකි ‘ඔර්වේලියානු’ (Orwellian) පාලන යාන්ත්රණයක් හෝ ඩිජිටල් සිරකූඩයක් (Panopticon) රට තුළ නිර්මාණය කිරීමට බවට ඔහු අනතුරු අඟවයි.
ශ්රී ලංකාවේ 16න් පහළ දරුවන් මුහුණ දෙන්නේ 2022 ආර්ථික කඩාවැටීමේ පසුබෑම, AI තාක්ෂණයේ වේගවත් වර්ධනය සහ දැඩි මානසික ආතතිය වැනි ගැටලුවලට වන අතර සමාජ මාධ්ය තහනමකින් සිදුවන්නේ රෝග ලක්ෂණය සැඟවීම පමණක් බව හත්තොටුව මහතා පවසයි. එබැවින්, කිසිදු දේශීය පර්යේෂණ දත්තයකින් තොරව, දේශපාලනඥයන්ගේ පෞද්ගලික මතය මත පදනම්ව මෙවැනි තහනම් පැනවීමට පෙර, යුරෝපා සංගමය (EU) මෙන් සමාජ මාධ්ය සමාගම්වල ‘ඇබ්බැහි කරවන සන්නිවේදන රටාවන්’ (Infinite scroll/Autoplay) පාලනය කිරීමට නීති සැකසීම සහ දරුවන්ගේ ඩිජිටල් සාක්ෂරතාව ඉහළ නැංවීම රජය වහාම කළ යුතු බව ඔහු වැඩිදුරටත් අවධාරණය කරයි.
