“දිට්වා” සුළි කුණාටුව හේතුවෙන් විපතට පත් බදුල්ල ප්රාදේශීය ලේකම් කොට්ඨාසයේ ජනතාව වෙනුවෙන් අර්ධ නිවාස හානි සහ ව්යාපාර හානි වන්දි චෙක්පත් ප්රදානය කිරීමේ වැඩසටහනක් ඊයේ (13) පැවැත්විණි. වැවිලි හා ප්රජා යටිතල පහසුකම් අමාත්ය සමන්ත විද්යාරත්න මහතාගේ ප්රධානත්වයෙන් බදුල්ල ප්රාදේශීය ලේකම් කාර්යාලයේදී මෙම වැඩසටහන ක්රියාත්මක විය.
ප්රතිලාභීන් 80 දෙනෙකු වෙත පිරිනැමූ වන්දි දීමනා පිළිබඳ විස්තර මෙසේය:
පවතින ආපදා තත්ත්වය හමුවේ හානියට පත් වූ එක් අර්ධ නිවාසයක් සඳහා රුපියල් 500,000ක උපරිමයකට යටත්ව වන්දි පිරිනමන ලදී. මීට අමතරව, කුණාටුවෙන් පීඩාවට පත් වූ ලියාපදිංචි ව්යාපාරික ස්ථාන සඳහා රුපියල් 200,000 බැගින් ද, ලියාපදිංචි නොකළ ව්යාපාර සඳහා රුපියල් 50,000 බැගින් ද වන්දි ලබා දී තිබේ. ජංගම වෙළඳසල් පවත්වාගෙන ගිය වින්දිතයන් වෙනුවෙන් රුපියල් 25,000 බැගින් වූ දීමනා පිරිනැමීමට පියවර ගෙන ඇත.
මෙම අවස්ථාවට අමාත්ය සමන්ත විද්යාරත්න මහතා සමඟ බදුල්ල ප්රාදේශීය සභාවේ සභාපති පාලිත ජයවර්ධන මහතා, බදුල්ල දිස්ත්රික් ලේකම් අනුරාධා නානායක්කාර මහත්මිය ඇතුළු නිලධාරීන් පිරිසක් සහභාගී වූහ. ආපදාවෙන් අහිමි වූ දේපළ යළි ගොඩනැඟීම සඳහා රජය ලබා දෙන මෙම දායකත්වය විපතට පත් ජනතාවට විශාල සහනයක් වනු ඇතැයි මෙහිදී අවධාරණය කෙරිණි.
