බලයෙන් පහ කරන ලද අවාමි ලීග් ආණ්ඩුවට සම්බන්ධ දේශපාලනඥයන්, ක්රියාකාරීන් සහ මාධ්යවේදීන් කිසිදු අධිචෝදනාවක් ගොනු නොකර දිගු කලක් රිමාන්ඩ් භාරයේ රඳවා තැබීම වහාම නතර කරන ලෙස Human Rights Watch (HRW) සංවිධානය බංග්ලාදේශ රජයෙන් ඉල්ලා තිබේ.
2024 අගෝස්තු මාසයේ ෂෙයික් හසීනා බලයෙන් ඉවත් වීමෙන් පසු අවාමි ලීග් පක්ෂයේ නිලධාරීන් සහ ආධාරකරුවන් දහස් ගණනක් අත්අඩංගුවට ගෙන ඇති අතර, ඔවුන්ගෙන් සිය ගණනක් කිසිදු අධිචෝදනාවක් නොමැතිව මේ දක්වා බන්ධනාගාරගතව සිටින බව HRW පෙන්වා දෙයි. හිටපු රජයේ ඇතැම් පිරිස් මානව හිමිකම් උල්ලංඝනවලට සම්බන්ධ වී තිබිය හැකි වුවත්, බොහෝ දෙනෙකු ප්රමාණවත් සාක්ෂි නොමැතිව අත්අඩංගුවට ගෙන ඇති බවත්, ඔවුන්ට ඇප, වෛද්ය ප්රතිකාර සහ මූලික නීතිමය අයිතිවාසිකම් පවා අහිමි කර ඇති බවත් ඔවුන්ගේ පවුල් සහ නීතිඥයන් චෝදනා කරති.
HRW දත්තවලට අනුව, 2026 පෙබරවාරි මාසයේ අග්රාමාත්ය තාරික් රහ්මාන් බලයට පත්වීමෙන් පසු අවාමි ලීග් නායකයන් සහ නිලධාරීන් අවම වශයෙන් 10 දෙනෙකු බන්ධනාගාර තුළදී මියගොස් තිබේ. විශේෂයෙන්ම 82 හැවිරිදි හිටපු අගවිනිසුරු ඒ.බී.එම්. කයිරුල් හක්ට ඇප ලැබෙන සෑම අවස්ථාවකම පොලීසිය නව නඩු ගොනු කර ඔහු නිදහස් වීම වළක්වා ඇති බව සංවිධානය සඳහන් කරයි. එපමණක් නොව, 81 හැවිරිදි හිටපු උපදේශක ඩොක්ටර් තව්ෆික්-ඊ-ඉලාහි චෞධුරි සහ 75 හැවිරිදි හිටපු පාර්ලිමේන්තු මන්ත්රී කමාල් අහමඩ් මජුම්දර් මාස 22කට වැඩි කාලයක් අධිචෝදනා නොමැතිව රඳවා සිටිති.
මෙය සාධාරණ අධිකරණ ක්රියාවලියක් නොවන බව අවධාරଣය කරමින් HRW හි ආසියා අධ්යක්ෂ ඉලේන් පියර්සන් ප්රකාශ කර ඇත්තේ, අධිචෝදනා ගොනු කිරීමට පෙරම වයෝවෘද්ධ පුද්ගලයන් බන්ධනාගාර තුළ මියයන තත්ත්වයක් ඇති වී තිබෙන බවයි. එබැවින් බන්ධනාගාර මරණ සම්බන්ධයෙන් ස්වාධීන පරීක්ෂණ පවත්වන ලෙසත්, අධිචෝදනා නොමැතිව දිගු කාලයක් රඳවා තැබීම වහාම නතර කරන ලෙසත් ඇය බංග්ලාදේශ රජයෙන් ඉල්ලා සිටී.
