ලෝකයේ ප්රධාන කොටස් වෙළඳපොළවල් මේ වන විට පවතින්නේ අධික මිල මට්ටමක (All-time highs) බවත්, ගෝලීය ආර්ථිකය මුහුණ දී සිටින අවදානම් තත්ත්වයන් එම මිල ගණන්වලින් නිසි ලෙස නිරූපණය නොවන බවත් එංගලන්ත මහ බැංකුවේ (Bank of England) නියෝජ්ය අධිපතිනි සාරා බ්රීඩන් මහත්මිය පවසයි. බීබීසී පුවත් සේවය සමඟ අද (24) පැවැති සම්මුඛ සාකච්ඡාවකදී ඇය පෙන්වා දුන්නේ ලෝක ආර්ථිකයට එල්ල වී ඇති විවිධ බලපෑම් හමුවේ ඕනෑම අවස්ථාවක කොටස් වෙළඳපොළවල් දැවැන්ත සංශෝධනයකට (Market adjustment) හෝ කඩාවැටීමකට ලක්වීමේ හැකියාවක් පවතින බවයි.
විශේෂයෙන්ම ඊශ්රායලය සහ ඉරානය අතර පවතින යුදමය වාතාවරණය හේතුවෙන් ගෝලීය ආර්ථික වර්ධනය මන්දගාමී වීම, උද්ධමනය ඉහළ යාම සහ ණය පොලී අනුපාත ඉහළ යාම මෙයට ප්රධාන වශයෙන් බලපා ඇති බව ඇය සඳහන් කරයි. කෘත්රිම බුද්ධිය (AI) හා සම්බන්ධ තාක්ෂණික කොටස්වල අගයන් අසීමිත ලෙස ඉහළ යාම සහ පෞද්ගලික ණය වෙළඳපොළ තුළ ඇති අවිශ්වාසය වැනි අවදානම් කිහිපයක් එකවර ක්රියාත්මක වුවහොත් මූල්ය පද්ධතියට දැඩි බලපෑමක් එල්ල විය හැකිය. මෙවැනි තත්ත්වයකට මුහුණ දීම සඳහා මූල්ය පද්ධතිය සූදානම් කිරීම සිය ප්රමුඛ කාර්යය බව ද ඇය වැඩිදුරටත් අවධාරණය කළාය.
