වියළි කාලගුණ තත්ත්වය හේතුවෙන් මඩකලපුව දිස්ත්රික්කයේ උනච්චි වැවේ ජල මට්ටම පහළ යාමත් සමඟ ප්රදේශයේ ජල සැපයුම දිනකට පැය 4ක කාලයක් සීමා කිරීමට සිදුව ඇති බව ජාතික ජල සම්පාදන හා ජලාපවහන මණ්ඩලය පවසයි. එහි සභාපති ඒ. එම්. පී. සි. ටී. බණ්ඩාර මහතා සඳහන් කළේ, උනච්චි වැවේ ජල මට්ටම පහළ යාම හේතුවෙන් දිනපතා පෙරවරු 11.00 සිට පස්වරු 3.00 පමණ දක්වා ජල සැපයුම අත්හිටුවීමට සිදුව ඇති බවය.
කෙසේ වෙතත්, දිවයින පුරා ජාතික ජල සම්පාදන හා ජලාපවහන මණ්ඩලයට අයත් ජල පිරිපහදු මධ්යස්ථාන සාමාන්ය පරිදි ක්රියාත්මක වන බවද සභාපතිවරයා සඳහන් කළ අතර, එම මධ්යස්ථානවල උපරිම ධාරිතාවයෙන් ජලය නිෂ්පාදනය කර බෙදාහැරීමට කටයුතු කරන බවද ඔහු පැවසීය. ශ්රී ලංකාවේ දිනකට ජලය ඝන මීටර් ලක්ෂ 28ක් පමණ නිෂ්පාදනය කරන අතර, ඉන් සියයට 23ත් 24ත් අතර ප්රමාණයක් මහා ජලාශවලින් ලබාගන්නා බවත්, තවත් සියයට 65කට ආසන්න ප්රමාණයක් ගංගා සහ ඇළදොළ ආශ්රිත ජල මූලාශ්රවලින් ලබාගන්නා බවත් සඳහන් වේ.
ඉන් ඝන මීටර් ලක්ෂ 6කට ආසන්න ප්රමාණයක් කැලණි ගඟෙන් ලබාගන්නා අතර, දිවයින පුරා ලබාගන්නා ජලයෙන් තුනෙන් එකකට ආසන්න ප්රමාණයක් කැලණි ගඟෙන් ලබාගන්නා බවද ඔහු වැඩිදුරටත් පෙන්වා දී ඇත. මේ අතර, වියළි කාලගුණ තත්ත්වයෙන් යම් බලපෑමක් එල්ල වී ඇත්තේ මඩකලපුව සහ මොනරාගල දිස්ත්රික්කවලට පමණක් වන අතර, මොනරාගල දිස්ත්රික්කයේ බිබිල සහ මැදගම ප්රදේශවල ජල මූලාශ්රවල ජල හිඟයක් පවතින බැවින් ජල සැපයුම පාලනය කරමින් ලබාදීමට කටයුතු කරන බව සභාපතිවරයා වැඩිදුරටත් ප්රකාශ කර තිබේ.
