පසුගිය මාර්තු 29 වන දින චීනයේ බීජිං අගනුවර නිරිතදිග ෆැන්ෂාන් (Fangshan) දිස්ත්රික්කයේ පිහිටි වෙළෙඳපොළක සිදුවූ බව පැවසෙන බරපතළ ප්රහාරයක් පිළිබඳ පුවත් චීන රජය විසින් වසං කරමින් සිටින බවට ජාත්යන්තර මාධ්ය සැක පළ කරයි. එරට රජය විසින් තහනම් කර ඇති ‘X’ (පෙර Twitter) සමාජ මාධ්ය ජාලය ඔස්සේ සංසරණය වන වීඩියෝ දර්ශන මගින් මෙම ප්රහාරයේ බිහිසුණු බව අනාවරණය වී තිබේ.
එම වීඩියෝ දර්ශනවලට අනුව, පුද්ගලයෙකු විසින් ඉදිකිරීම් කටයුතු සඳහා යොදාගන්නා යන්ත්රයක් (Construction vehicle) වෙළෙඳ කුටි අතරින් වේගයෙන් පදවාගෙන ගොස් ඇති අතර, එහිදී වෙළෙඳපොළ දැඩි අවුල් සහගත තත්ත්වයකට පත්ව ඇත. එක් වීඩියෝවක පුද්ගලයෙකු බිම වැටී නිසලව සිටින අයුරු ද දැකගත හැකිය. කෙසේ වෙතත්, චීන බලධාරීන් හෝ එරට නිල පුවත් සේවා මේ පිළිබඳව කිසිදු තොරතුරක් මෙතෙක් වාර්තා කර නොමැත.
ප්රහාරය සිදු වූ බව කියන ස්ථානයට පසු දින ‘The Economist’ පුවත්පතේ නියෝජිතයන් ගිය අවස්ථාවේදී, එම ප්රදේශය පොලිස් නිලධාරීන් සහ කොමියුනිස්ට් පක්ෂයේ ස්වේච්ඡා සේවකයන් විශාල පිරිසක් විසින් වට කර තිබූ බව වාර්තා වේ. එහි සිටි පොලිස් නිලධාරියෙකුගෙන් මේ පිළිබඳව විමසූ විට, ඔහු එවැනි සිදුවීමක් වූ බව සෘජුව ප්රකාශ කිරීම ප්රතික්ෂේප කර ඇත. යම් හෙයකින් එවැනි ප්රහාරයක් සිදුවූයේ නම්, ඒ පිටුපස මානසික ආබාධයක් සහිත පුද්ගලයෙකු සිටිය හැකි බවත්, චීන පොලිසිය ඉතා කාර්යක්ෂම බැවින් අපරාධකරු දැනටමත් අත්අඩංගුවේ පසුවන බවත් ඔහු පවසා තිබේ. කෙසේ වෙතත්, ප්රදේශවාසීන්ගෙන් ප්රශ්න කිරීමට මාධ්යවේදීන්ට ඉඩ ලබා නොදීමට පොලිසිය කටයුතු කර ඇත.
