බෙල්ලන්විල රජමහා විහාරස්ථානයේ ඇසළ මහා පෙරහර හේතුවෙන් අද (13), හෙට (14) සහ අනිද්දා (15) යන තෙදින තුළ පෙරහර ගමන් ගන්නා මාර්ගයන්හි රථවාහන ගමනාගමනය සීමා කර ඇතැයි පොලිසිය පවසයි.
පෙරහර පැවැත්වෙන කාල සීමාවන් තුළ මහනගර ප්රදේශවල සිදුවන වාහන තදබදය අවම කර ගැනීම සඳහා රියැදුරන්ට විකල්ප මාර්ග භාවිත කරන ලෙස පොලිසිය දැඩිව ඉල්ලා සිටියි.
අද (13) දින රාත්රී 7.00 සිට 10.00 දක්වා පාවඩ පෙරහර වීථි සංචාරය කරන අතර, 119 මහරගම – දෙහිවල බස් මාර්ගයේ බොරලැස්ගමුව නගරයෙන් සහ බෙල්ලන්තර මංසන්ධියෙන් රථවාහන ගමනාගමනය සීමා කෙරේ. හෙට (14) දින රන්සිවලී පෙරහර රාත්රී 8.00 සිට පසුදින අලුයම 2.00 දක්වා පැවැත්වෙන අතර, බොරලැස්ගමුව මංසන්ධියේ සිට බෙල්ලන්තර මංසන්ධිය දක්වා 119 බස් මාර්ගයේ වාහන ගමනාගමනය සීමා වේ. අනිද්දා (15) දින රන්දෝලි මහා පෙරහර රාත්රී 8.00 සිට පසුදින අලුයම 4.00 දක්වා ගමන් ගන්නා අතර, බොරලැස්ගමුව, බෙල්ලන්තර, නැදිමාල මෙන්ම අත්තිඩිය පොලිස් පුහුණු විද්යාලය හා පැපිලියාන මංසන්ධි ආශ්රිතව විශේෂ රථවාහන සීමා පැනවේ.
මහරගම, පිළියන්දල සහ දෙහිවල දෙසට ගමන් ගන්නා රියැදුරන් අපහසුතාවට පත් නොවනු පිණිස පැපිලියාන මාර්ගය, ස්පාර් වටරවුම, වේරහැර – ගංගාරාම මාර්ගය සහ කොහුවල – කළුබෝවිල මාර්ගය ඇතුළු නම් කරන ලද විකල්ප මාර්ග භාවිත කරන ලෙස පොලිසිය වැඩිදුරටත් දන්වා සිටියි.
