ශ්රී ලංකාව තුළ වාර්ෂිකව රිය අනතුරු හේතුවෙන් පුද්ගලයන් 2,700 කට අධික පිරිසක් මියයන බව ප්රවාහන, මහාමාර්ග හා නාගරික සංවර්ධන අමාත්ය බිමල් රත්නායක මහතා පවසයි. ජාතික ප්රවාහන වෛද්ය ආයතනය විසින් සංවිධානය කරන ලද විශේෂ එක්දින වැඩමුළුවකට සහභාගී වෙමින් අමාත්යවරයා සඳහන් කළේ, 2029 වසර වන විට මෙලෙස සිදුවන මාරක රිය අනතුරු සංඛ්යාව සැලකිය යුතු මට්ටමකින් අවම කිරීම රජයේ අපේක්ෂාව බවයි. මාර්ග සංවර්ධනය සහ යටිතල පහසුකම් කොතරම් දියුණු කළ ද, මාර්ග පරිශීලකයන්ගේ විනය සහ නිසි පුහුණුවකින් තොරව ප්රවාහන ආරක්ෂාව තහවුරු කළ නොහැකි බව ද ඔහු මෙහිදී පෙන්වා දුන්නේය.
දැනට පවතින දත්තයන්ට අනුව රියදුරන්ගෙන් 15% ත් 18% ත් අතර ප්රමාණයක් මත්ද්රව්ය භාවිතයට යොමු වී ඇති අතර, සමස්ත රිය අනතුරුවලින් 53% ක්ම සිදු වන්නේ රියදුරන්ගේ වැරදි සහ දුර්වලතා හේතුවෙනි. මගී ආරක්ෂාව පෙරදැරි කරගත් ජාතික ප්රවාහන ක්රියාකාරී සැලැස්මක් මේ වන විට රජය විසින් ක්රියාත්මක කර ඇති අතර, විනයගරුක මාර්ග සංස්කෘතියක් ඇති කිරීම එහි ප්රධාන අංගයකි. මීට අමතරව, ශ්රී ලංකාවට ගැළපෙන ප්රමිතියෙන් යුත් බස් රථ සේවාවන් සහ වාහන ආනයනය කිරීම කෙරෙහි ද රජයේ අවධානය යොමු වී තිබේ.
ප්රවාහන පද්ධතියේ ගුණාත්මකභාවය ඉහළ නැංවීම සඳහා වාහන නිෂ්පාදකයන්ගේ වගකීම පිළිබඳව ද දැඩි ලෙස සොයා බලන බව අමාත්යවරයා වැඩිදුරටත් ප්රකාශ කළේය. දිගුකාලීන ජාතික වැඩපිළිවෙළක් හරහා ප්රවාහන ක්ෂේත්රයේ ආරක්ෂාව තහවුරු කිරීම රජයේ මූලික අරමුණ වී ඇති අතර, ඒ සඳහා අවශ්ය ප්රතිසංස්කරණ රැසක් ඉදිරි කාලය තුළ හඳුන්වා දීමට නියමිතය. රිය අනතුරු අවම කිරීමේ මෙම ඉලක්කය සපුරා ගැනීම සඳහා සියලුම පාර්ශවයන්ගේ සහාය අත්යවශ්ය වන බව ද අමාත්යවරයා අවධාරණය කළේය.
