බෝගම්බර පැරණි බන්ධනාගාර පරිශ්රය සහ ගාල්ල මහමෝදර රෝහල් ගොඩනැගිල්ල තාවකාලිකව බන්ධනාගාර දෙපාර්තමේන්තුව වෙත ලබා දී ඇත්තේ මාස තුනක කෙටි කාලයක් සඳහා පමණක් බව සෞඛ්ය නියෝජ්ය අමාත්ය වෛද්ය හංසක විජේමුණි මහතා පවසයි. උඩුනුවර හිරාපිටියේදී අද (12) මාධ්ය හමුවක් පවත්වමින් ඔහු මේ බව සඳහන් කළේය.
මෙම පියවර ගෙන ඇත්තේ බන්ධනාගාර තුළ පවතින අධික තදබදය අවම කිරීමේ අරමුණින් බවත්, බන්ධනාගාර ගතව සිටින පිරිස දැනට පහසුකම් ඇති සංඛ්යාව මෙන් තුන් ගුණයකින් පමණ ඉහළ ගොස් ඇති බවත් අමාත්යවරයා පෙන්වා දුන්නේය. සෞඛ්ය අමාත්යාංශය මගින් සංචාරක ප්රවර්ධනය සහ රෝහල් කටයුතු වෙනුවෙන් යොදා ගැනීමට සැලසුම් කර තිබූ මෙම ගොඩනැගිලි, තාවකාලික විසඳුමක් ලෙස බන්ධනාගාර දෙපාර්තමේන්තුවට ලබා දී ඇත්තේ බන්ධනාගාර පද්ධතියේ පවතින අර්බුදයට කෙටි කාලීන සහනයක් ලබා දීම සඳහාය.
බන්ධනාගාර තදබදයට හේතු:
බන්ධනාගාර තුළ පවතින තදබදයට නඩු ප්රමාදය, නියමිත කාලයට නඩු වාර්තා නොලැබීම සහ පද්ධතියේ පවතින දුර්වලතා ප්රධාන හේතු වී ඇති බව අමාත්යවරයා පැවසීය. මෙම ගැටලුවලට ස්ථිර විසඳුම් ලබා දීම සඳහා නවීන ප්රමිතියෙන් යුත් බන්ධනාගාර ඉදිකිරීමට රජය අවධානය යොමු කර තිබේ.
විපක්ෂයේ විශ්වාසභංග යෝජනාව පිළිබඳව:
බන්ධනාගාර අමාත්යවරයාට එරෙහිව විපක්ෂය ගෙන ඒමට සූදානම් වන විශ්වාසභංග යෝජනාව සම්බන්ධයෙන් අදහස් දැක්වූ නියෝජ්ය අමාත්යවරයා සඳහන් කළේ, පාර්ලිමේන්තුවේ ප්රමාණවත් බලයක් නොමැති විපක්ෂය පදනම් විරහිත මාධ්ය සංදර්ශන පවත්වමින් මෙවැනි ක්රියාමාර්ග ගන්නා බවයි. මෙවැනි අදූරදර්ශී දේශපාලන ක්රියා හේතුවෙන් සිදුවන්නේ ජනතාව අතරින් විපක්ෂය තවදුරටත් ප්රතික්ෂේප වීම බවත්, ඕනෑම විශ්වාසභංගයකට මුහුණ දීමට රජය සූදානම් බවත් ඔහු වැඩිදුරටත් අවධාරණය කළේය.
