මුදල් ඉල්ලමින් සිය දෙමාපියන්ට සහ මිත්තණියට අමානුෂික ලෙස බැණ වැදුණු වැඩිමල් සහෝදරයාව පිහියෙන් ඇන ඝාතනය කළ බව කියන තරුණයෙකු බොරලැස්ගමුව පොලිසිය විසින් අත්අඩංගුවට ගෙන තිබේ.
ඝාතනයට ලක්ව ඇත්තේ බොරලැස්ගමුව, ලියනගේ පාරේ පදිංචිව සිටි මොහොමඩ් පයිස් මොහොමඩ් ෆශිල් නමැති 26 හැවිරිදි පරිගණක ක්රියාකරුවෙකි. මියගිය පුද්ගලයා පසුගිය දින කිහිපය පුරාම සිය දෙමාපියන්ගෙන් මුදල් ඉල්ලා නිතර ආරවුල් ඇති කරගෙන තිබූ බව පොලිස් පරීක්ෂණවලදී අනාවරණය වී ඇත. ඊයේ (06) රාත්රියේ ද මෙම මුදල් ප්රශ්නය මුල් කරගනිමින් ඇති වූ ආරවුලකදී, ඔහු දෙමාපියන්ට සිදු කළ අපහාස ඉවසාගත නොහැකි වූ තැන බාල සහෝදරයා පිහියකින් පහර දී මෙම ඝාතනය සිදු කර තිබේ.
ඝාතනය සිදු කිරීමෙන් අනතුරුව සැකකරු විසින්ම බොරලැස්ගමුව පොලිසිය වෙත පැමිණ භාර වී ඇති අතර එහිදී ඔහු සිය වරද පාපොච්චාරණය කර ඇත. සිද්ධිය වූ ස්ථානයට පැමිණි නුගේගොඩ අතිරේක මහේස්ත්රාත් සංජය විජේසිංහ මහතා මහේස්ත්රාත් පරීක්ෂණය පැවැත්වූ අතර නුගේගොඩ අපරාධ පරීක්ෂණාගාරයේ (SOCO) නිලධාරීන් විසින් විද්යාත්මක සාක්ෂි ලබාගෙන තිබේ. සැකකරු අද (07) නුගේගොඩ මහේස්ත්රාත් අධිකරණය වෙත ඉදිරිපත් කිරීමට නියමිතව තිබුණි.
