හිටපු සිවිල් ගුවන් සේවා අමාත්ය පියංකර ජයරත්න මහතාට එරෙහිව පවරා ඇති අල්ලස් නඩුවක්, කොන්දේසි සහිතව ඉල්ලා අස්කර ගන්නා ලෙස විත්ති පාර්ශ්වය කළ ඉල්ලීම අල්ලස් හෝ දූෂණ චෝදනා විමර්ශන කොමිෂන් සභාව විසින් ප්රතික්ෂේප කර තිබේ. වරද පිළිගැනීම හෝ වෙනත් එකඟතාවන් මත නඩුව අවසන් කරන ලෙස විත්තිය කළ මෙම ඉල්ලීම ප්රතික්ෂේප වීමත් සමඟ නඩුවේ සාක්ෂි විමසීම දිගටම කරගෙන යාමට අධිකරණය තීරණය කළේය.
මහාධිකරණ විනිසුරු රශාන්ත ගොඩවෙල මහතා ඉදිරියේ ඊයේ (06) මෙම නඩුව කැඳවූ අවස්ථාවේදී, පැමිණිල්ලේ 3 වැනි සහ 4 වැනි සාක්ෂිකරුවන්ගෙන් සාක්ෂි විමසා අවසන් කෙරිණි. හිටපු ජනාධිපති මහින්ද රාජපක්ෂ මහතාගේ පදවි ප්රාප්තිය නිමිත්තෙන් පවත්වන ලද ‘දැයට කිරුළ’ ප්රදර්ශනයේ ගෙවීම් සම්බන්ධයෙන් එල්ල වූ චෝදනා මත මෙම නඩුව පවරා ඇත.
නඩුවේ වැඩිදුර සාක්ෂි විභාගය ලබන ජූනි මස 30 වැනිදාට නියම කර තිබේ. අල්ලස් කොමිසමේ සහකාර අධ්යක්ෂ ජනරාල් තනූජා බණ්ඩාර මහත්මිය පැමිණිල්ල මෙහෙයවූ අතර, ජනාධිපති නීතිඥ ශවේන්ද්ර ප්රනාන්දු මහතා විත්තිය වෙනුවෙන් පෙනී සිටියේය. මීට අමතරව පියංකර ජයරත්න මහතාට එරෙහිව අල්ලස් කොමිසම විසින් තවත් නඩු 4ක් පවරා ඇති බව වාර්තා වේ.
