ශ්රී ලංකාවේ පෞද්ගලික අංශයේ වර්ධනය, ආයෝජන දිරිගැන්වීම සහ සමස්ත ව්යාපාරික තරඟකාරිත්වය ඉහළ නැංවීම අරමුණු කරගනිමින් “ජාතික නියාමන ප්රතිසංස්කරණ කවුන්සිලයක්” පිහිටුවීමට අමාත්ය මණ්ඩල අනුමැතිය හිමිව තිබේ. වත්මන් නියාමන රාමුව තුළ පවතින ඇතැම් සීමාවන් සහ බාධාවන්, විශේෂයෙන්ම රටේ ආර්ථිකයේ කොඳු නාරටිය බඳු වූ කුඩා හා මධ්ය පරිමාණ ව්යවසායයන් (SMEs) වෙත අහිතකර ලෙස බලපාන බවත්, එය ශ්රී ලංකාව ජාත්යන්තර ආයෝජන ගමනාන්තයක් ලෙස ප්රවර්ධනය වීමට බාධාවක් වී ඇති බවත් හඳුනාගැනීම හේතුවෙන් මෙම තීරණය ගෙන ඇත.
මෙම නව ප්රතිසංස්කරණ ක්රියාවලිය සඳහා කර්මාන්ත සහ ව්යවසායකත්ව සංවර්ධන අමාත්යාංශය විසින් ආසියානු සංවර්ධන බැංකුවේ (ADB) මූල්ය හා තාක්ෂණික දායකත්වය ඇතිව මෙරට නියාමන රාමුව පිළිබඳ සවිස්තරාත්මක ඇගයීමක් සිදුකර තිබේ. ඉන් අනතුරුව අදාළ සියලුම පාර්ශ්වකරුවන් සමඟ පවත්වන ලද පුළුල් සාකච්ඡාවලින් පසු “ජාතික නියාමන ප්රතිසංස්කරණ ක්රියාකාරී සැලැස්ම” සහ එහි ක්රියාකාරී යාන්ත්රණය සකස් කර ඇත. මෙම සැලැස්ම මඟින් ඉදිරිපත් කර ඇති ප්රායෝගික නිර්දේශයන් කෙටිකාලීන, මධ්යකාලීන සහ දිගුකාලීන වශයෙන් ප්රමුඛතා පදනම මත ක්රියාත්මක කිරීමට නියමිතය.
මෙම සමස්ත ක්රියාකාරී සැලැස්ම මෙහෙයවීම, ක්රියාත්මක කිරීම සහ අධීක්ෂණය කිරීමේ ප්රධාන මධ්යම ආයතනික යාන්ත්රණය ලෙස මෙම “ජාතික නියාමන ප්රතිසංස්කරණ කවුන්සිලය” ක්රියාත්මක වේ. ඒ අනුව ජනාධිපතිවරයාගේ සභාපතිත්වයෙන් යුතුව මෙම කවුන්සිලය පිහිටුවීමටත්, එහි නිල ලේකම් කාර්යාලය ලෙස කර්මාන්ත සහ ව්යවසායකත්ව සංවර්ධන අමාත්යාංශය පත් කිරීමටත් කර්මාන්ත සහ ව්යවසායකත්ව සංවර්ධන අමාත්යවරයා ඉදිරිපත් කළ කැබිනට් පත්රිකාවට මෙලෙස අමාත්ය මණ්ඩලයේ ඒකමතික අනුමැතිය හිමිව ඇත.
