ඉදිරියේදී ඇති විය හැකි එල්-නිනෝ දේශගුණික බලපෑමට මුහුණ දීම සහ ඒ සඳහා අවශ්ය කෙටිකාලීන, මධ්යකාලීන හා දිගුකාලීන සැලසුම් සකස් කිරීම අරමුණු කරගනිමින් පත් කළ විශේෂ අමාත්ය මණ්ඩල අනුකමිටුව සහ නිලධාරී කමිටුව ඊයේ (ජූනි 30) පස්වරුවේ ජනාධිපති කාර්යාලයේදී පළමු වරට රැස්විය. පරිසර අමාත්ය වෛද්ය දම්මික පටබැඳි මහතාගේ සභාපතිත්වයෙන් මෙම රැස්වීම පැවැත්විණි.ආහාර සුරක්ෂිතතාව, ජල කළමනාකරණය සහ බලශක්ති සුරක්ෂිතතාව පවත්වාගෙන යමින්, රාජ්ය ආයතන අතර නිසි සම්බන්ධීකරණය සහ මහජනතාව දැනුවත් කිරීම හරහා ආපදා අවදානම අවම කිරීම මෙම කමිටු පත් කිරීමේ මූලික අරමුණයි. එල්-නිනෝ තත්ත්වය සම්බන්ධයෙන් මේ වන විට පවතින ප්රබල සම්භාවිතාව 63%ක් බවත්, දුර්වල සම්භාවිතාව 33%ක් බවත් මෙහිදී අනාවරණය විය. ඒ අනුව පානීය ජලය, වාරිමාර්ග සහ බලශක්තිය කෙරෙහි විශේෂ අවධානයක් යොමු කළ යුතු බව අවධාරණය කෙරිණි.අදාළ සියලු තත්ත්වයන්ට මුහුණ දීම සඳහා අවශ්ය නිශ්චිත වැඩපිළිවෙළක් සති දෙකක් ඇතුළත සකස් කරන ලෙස අදාළ අමාත්යාංශ සහ දෙපාර්තමේන්තුවලට උපදෙස් ලබා දුන් අතර, එල්-නිනෝ තත්ත්වය සම්බන්ධයෙන් කාලගුණ විද්යා දෙපාර්තමේන්තුව මගින් පමණක් නිල ප්රකාශ නිකුත් කිරීමට ද මෙහිදී තීරණය කරනු ලැබීය.මෙම අවස්ථාව සඳහා අමාත්යවරුන් වන කේ. ඩී. ලාල්කාන්ත, සමන්ත විද්යාරත්න, අනුර කරුණාතිලක, වසන්ත සමරසිංහ සහ සුසිල් රණසිංහ යන මහත්වරුන් ද, ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති මහතා සහ අමාත්යාංශ ලේකම්වරුන් ඇතුළු නිලධාරීන් පිරිසක් සහභාගී වූහ.
