කැලිෆෝනියා ප්රාන්තයේ මාර්ගවල ගමන් කරන ස්වයංක්රීය මෝටර් රථ රථවාහන නීති උල්ලංඝනය කිරීමේ අවස්ථා වැඩිවීමත් සමඟ, එම සමාගම්වලට එරෙහිව නීතිමය ක්රියාමාර්ග ගැනීමට කැලිෆෝනියා මෝටර් රථ දෙපාර්තමේන්තුව පියවර ගෙන තිබේ. ජූලි මස 1 වනදා සිට බලාත්මක වන මෙම නව රෙගුලාසි මගින් පොලිසියට ස්වයංක්රීය මෝටර් රථ නිෂ්පාදකයන් වෙත කෙළින්ම අනුකූල නොවන බවට වන දැනුම්දීමක් නිකුත් කිරීමේ බලය හිමිවේ.
මෙම නව රෙගුලාසි යටතේ ස්වයංක්රීය මෝටර් රථ රථවාහන නීති උල්ලංඝනය කළහොත් අදාළ සමාගම්වලට එරෙහිව පොලිසියට දඩ නිකුත් කළ හැකි අතර, රථවාහන පොලිසිය සහ හදිසි සේවා නිලධාරීන්ගෙන් ලැබෙන ඇමතුම්වලට තත්පර 30ක් ඇතුළත ප්රතිචාර දැක්වීමට එම සමාගම් බැඳී සිටී. මීට අමතරව වාහන හදිසි සේවා කලාප තුළට ඇතුළු වුවහොත් සමාගම් වෙත දඩ මුදල් නියම කෙරෙනු ඇත.
වේමෝ සහ ටෙස්ලා වැනි සමාගම් කැලිෆෝනියාවේ ස්වයංක්රීය මෝටර් රථ තාක්ෂණය අත්හදා බලන ප්රධාන ආයතන අතර වන අතර, පසුගිය වසරේ සැන් ෆ්රැන්සිස්කෝ නගරයේ සිදුවූ විදුලි බිඳවැටීමකදී මෙම වාහන මාර්ග නීති කඩ කළ බවට වාර්තා වීමත් සමඟ පොදු ආරක්ෂාව සහතික කිරීම සඳහා මෙම පියවර ගෙන ඇති බව මෝටර් රථ දෙපාර්තමේන්තුවේ අධ්යක්ෂ ස්ටීව් ගෝර්ඩන් මහතා ප්රකාශ කළේය. මෙම රෙගුලාසි එක්සත් ජනපදය තුළ පවතින වඩාත්ම විධිමත් ස්වයංක්රීය මෝටර් රථ නීති මාලාව ලෙස සැලකේ.
