නයගරා ගංගාවේ වෙරළබඩ තෙත්බිම් පද්ධතියෙන් 75%කට වඩා විනාශ වී යාමෙන් පසු, ප්රතිචක්රීකරණය කරන ලද නත්තල් ගස් ගංපතුලට සවි කරමින් පරිසර පද්ධතිය නැවත යථා තත්ත්වයට පත් කිරීමට කැනඩාව පියවර ගෙන තිබේ.
මෙම අද්විතීය පාරිසරික වැඩසටහන මගින් මත්ස්යයන් සහ ජලජ ජීවීන් වෙනුවෙන් කිලෝමීටර 1.64ක ස්වාභාවික වාසස්ථාන ප්රමාණයක් සාර්ථකව නිර්මාණය කර ඇති අතර, තෙත්බිම් අහිමි වීම නිසා ලේක් ස්ටර්ජන් සහ මස්කෙලන්ජ් වැනි ප්රධාන මත්ස්ය විශේෂවල ගහනයට එල්ල වූ බලපෑම පාලනය කිරීමට මෙය හේතු වී ඇත. Niagara Parks ආයතනය, ඔන්ටාරියෝ ස්වාභාවික සම්පත් සහ වනජීවී අමාත්යාංශය සහ කැනඩා පරිසර හා කාලගුණ විපර්යාස දෙපාර්තමේන්තුව එක්ව 2016 වසරේදී මෙම ප්රතිසංස්කරණ වැඩසටහන ආරම්භ කර ඇත. උත්සව සමයෙන් පසු ඉවතලන නත්තල් ගස් සහ ඇෂ් ගස්වල කොටස් ගංපතුලට සවි කරමින් ජලයේ රළ පහරවල් පාලනය කිරීමටත්, ජලජ ජීවීන්ට ආරක්ෂිත ලැගුම් හා බෝ වීමට අවශ්ය පරිසරය සැකසීමටත් කටයුතු කර තිබේ. 2025 ග්රීෂ්ම ඍතුවේදී ගස් හා ලොගින් සැකසූ ව්යුහයන් 70ක් සහ ටොන් 360කට වැඩි ගල් පර්වත යොදා ගනිමින් තවත් මීටර් 240ක තෙත්බිම් කලාපයක් අලුතින් නිර්මාණය කර ඇති අතර, මේ නිසා මත්ස්යයන්, වෙරළබඩ පක්ෂි ගහනය සහ ජලයේ ගුණාත්මකභාවය සැලකිය යුතු ලෙස ඉහළ ගොස් ඇත.
