මඩකලපුව සහ මහරගම අපේක්ෂා රෝහල්වල පිළිකා ප්‍රතිකාර අඩාල වේ

රේඛීය ත්වරක (LINAC) යන්ත්‍රවල බිඳවැටීම්, නව සී.ටී. (CT) සිමියුලේටර් යන්ත්‍රයේ ගැටලු සහ ජී-සී.එස්.එෆ්. (G-CSF) ඖෂධ හිඟයක් හේතුවෙන් මඩකලපුව ශික්ෂණ රෝහලේ සහ මහරගම අපේක්ෂා රෝහලේ පිළිකා ප්‍රතිකාර සේවාවන්ට දැඩි ලෙස බාධා එල්ල වී තිබේ.

රෝහල් දෙකේම LINAC යන්ත්‍ර අක්‍රිය වීම හේතුවෙන් දිනකට පිළිකා රෝගීන් 130කට වැඩි පිරිසකගේ විකිරණ ප්‍රතිකාර (Radiation treatment) අඩාල වී ඇත.

රජයේ විකිරණ විද්‍යා තාක්ෂණවේදීන්ගේ සංගමයේ සභාපති චානක ධර්මවික්‍රම මහතා ප්‍රකාශ කළේ, මඩකලපුව රෝහලේ LINAC යන්ත්‍රය පසුගිය සඳුදා (3) සිට අක්‍රිය වීම නිසා දිනකට රෝගීන් 60කට ආසන්න සංඛ්‍යාවකට ප්‍රතිකාර අත්හිටුවීමට සිදුව ඇති බවයි.

මහරගම අපේක්ෂා රෝහලේ ඇති LINAC යන්ත්‍ර හතරෙන් එකක්ද ජූලි 30 වැනිදා සිට අක්‍රිය වී ඇති අතර, එමඟින් දිනකට රෝගීන් 75කට වැඩි පිරිසකට සිදුකළ ප්‍රතිකාර සම්පූර්ණයෙන් ඇනහිට තිබේ.

යන්ත්‍රය පිහිටා ඇති ගොඩනැගිල්ලේ වායු සමීකරණ පද්ධතියේ දෝෂයක් හේතුවෙන් මහරගම රෝහලේ මෙම තත්ත්වය හටගෙන ඇති අතර, ගැබ්ගෙල පිළිකා සඳහා ප්‍රතිකාර ලබාදෙන බ්‍රැකිතෙරපි (brachytherapy) යන්ත්‍ර ද අගෝස්තු 2 වැනිදා සිට අත්හිටුවා ඇත.

මහරගම රෝහලේ අඛණ්ඩ විදුලි සැපයුමක් සඳහා උපස්ථ ජනක යන්ත්‍රයක් (generator) නොමැති වීම හේතුවෙන් ක්‍රියාත්මක වන අනෙක් යන්ත්‍ර තුනද අවදානම් සහගත තත්ත්වයක පවතී.

රෝහලේ මෑතකදී ස්ථාපනය කරන ලද නව සී.ටී. සිමියුලේටර් යන්ත්‍රය අවශ්‍ය ප්‍රමිතීන්ට අනුකූල නොවීම නිසා භාවිතා කළ නොහැකි වී ඇති අතර, ඒ වෙනුවට රෝගී ස්කෑන් පරීක්ෂණ නොමැති අවස්ථාවලදී පොසිට්‍රෝන් විමෝචන ටොමොග්‍රැෆි (PET) ස්කෑනරය භාවිතා කිරීමට ඔන්කොලොජි වෛද්‍යවරුන්ට සිදුව ඇත.

රසායනික චිකිත්සාවෙන් (chemotherapy) පසු ප්‍රතිශක්තිය වර්ධනය කිරීම සඳහා ලබාදෙන ජී-සී.එස්.එෆ්. (G-CSF) ඖෂධයේ හිඟයක්ද මෙම තත්ත්වය තවත් උග්‍ර කර තිබේ.