චීනයේ විශාලතම වෙළෙඳ ප්රදර්ශනය වන ‘කැන්ටන් ෆෙයාර්’ (Canton Fair) මෙවර ආරම්භ වී ඇත්තේ ඉරාන යුද්ධය හේතුවෙන් පැන නැගී ඇති ආර්ථික අභියෝග රැසක් මධ්යයේය. ප්රදර්ශනයට සහභාගී වී සිටින චීන අපනයනකරුවන් පෙන්වා දෙන්නේ යුදමය වාතාවරණය හේතුවෙන් අමුද්රව්ය මිල ඉහළ යාම සහ නිෂ්පාදන පිරිවැය වැඩි වීම සිය ව්යාපාරවලට දැඩි ලෙස බලපා ඇති බවයි. විශේෂයෙන්ම ප්ලාස්ටික් වැනි අමුද්රව්යවල මිල 20%කින් පමණ ඉහළ ගොස් ඇති අතර එම පිරිවැය විදේශීය පාරිභෝගිකයන් වෙත මුදා හැරීමට නොහැකි වීම නිසා කර්මාන්තශාලා හිමියන් දැඩි මූල්ය පීඩනයකට ලක්ව සිටිති.
ලෝක වෙළෙඳපොළේ ඉල්ලුම පහත වැටීම සහ ප්රවාහන වියදම් ඉහළ යාම පිළිබඳවද මෙහිදී අපනයනකරුවෝ සිය කනස්සල්ල පළ කරති. ඇතැම් ව්යාපාරිකයන් මෙම අමතර පිරිවැය තමන් විසින්ම දරා ගැනීමට කටයුතු කරන අතර තවත් පිරිසක් භාණ්ඩවල මිල ඉහළ දැමීමට පෙළඹී සිටිති. කෙසේ වෙතත් එළඹෙන මැයි මාසයේදී අමෙරිකානු ජනාධිපති ඩොනල්ඩ් ට්රම්ප් චීනයේ සංචාරය කිරීමට නියමිත වීම පිළිබඳව ව්යාපාරික ප්රජාව තුළ යම් බලාපොරොත්තුවක් පවතින අතර එමඟින් යුද වාතාවරණය සමනය වී වෙළෙඳ සබඳතා යහපත් වනු ඇතැයි ඔවුහු අපේක්ෂා කරති.
