දශක තුනකට අධික කාලයක් පවතින මෝල්ඩෝවා රජය සහ එරටින් වෙන්වී සිටින රුසියානු හිතවාදී ට්රාන්ස්නිස්ට්රියා (Transdniestria) කලාපය අතර ආරවුල විසඳා ගැනීම සඳහා බ්රහස්පතින්දා පැවැති සාකච්ඡා කිසිදු ප්රගතියකින් තොරව බිඳ වැටී තිබේ. 2030 වසර වන විට යුරෝපා සංගමයට එක්වීමේ මෝල්ඩෝවා රජයේ ඉලක්කය හමුවේ මෙම සාකච්ඡා ඉතා තීරණාත්මක විය.
ට්රාන්ස්නිස්ට්රියා පරිපාලන මධ්යස්ථානය වන ටිරාස්පෝල් (Tiraspol) හිදී පැවැති මෙම හමුවේදී දෙපාර්ශවයම එකිනෙකාට චෝදනා එල්ල කරගත් අතර, තම ස්ථාවරයන්ගෙන් බැහැර වීමට කිසිදු පාර්ශවයක් සූදානම් නොවීය. විධිමත් සාකච්ඡා යළි ආරම්භ කිරීම සඳහා වන ඒකාබද්ධ ප්රකාශයකට අත්සන් තැබීම බෙදුම්වාදී පාර්ශවය ප්රතික්ෂේප කර ඇති බව මෝල්ඩෝවා නියෝජ්ය අගමැති වැලෙරියු චිවේරි පැවසීය. අනෙක් අතට, ට්රාන්ස්නිස්ට්රියා විදේශ අමාත්යවරයා චෝදනා කළේ මෝල්ඩෝවා බලධාරීන් මෙම ක්රියාවලිය කඩාකප්පල් කිරීමට උත්සාහ කරන බවයි.
සෝවියට් පාලනය බිඳ වැටීමට පෙර, එනම් 1991 දී මෝල්ඩෝවාවෙන් වෙන් වූ මෙම කලාපය රුසියාවේ සහය ලබන නමුත් ජාත්යන්තර පිළිගැනීමක් නොමැති ස්වයං පාලන ඒකකයක් ලෙස පවතී. 1992 කෙටි යුද්ධයකින් පසු එරට තුළ විශාල ගැටුම්කාරී තත්ත්වයක් වාර්තා නොවූවද, වත්මන් දේශපාලන තත්ත්වය තුළ මෙම අර්බුදය මෝල්ඩෝවාවේ යුරෝපා සංගම් ගමනට විශාල බාධාවක් වී ඇත.
