ශ්රී ලංකාවේ කතෝලික සභාවේ ප්රධාන නායකත්ව පරිවර්තනයක් මේ වසර අවසානයේදී සිදුවීමට නියමිත බවට ඇතැම් මාධ්ය ජාල ඔස්සේ පැතිර යන පුවතත් සමඟ දැඩි කතාබහක් නිර්මාණය වී තිබේ. අගරදගුරු අති උතුම් මැල්කම් කාදිනල් රංජිත් හිමිපාණන් 2026 වසරේදී සිය ධුරයෙන් ඉවත්වීමට තීරණය කර ඇති බවට පළවන මෙම වාර්තා හමුවේ කතෝලික ජනතාව මෙන්ම සමස්ත රටම මේ වන විට පසුවන්නේ දැඩි කුතුහලයකිනි. කෙසේ වෙතත්, මෙම තොරතුරුවල සත්ය අසත්යතාවය පිළිබඳව අගරදගුරු පදවි ජන සන්නිවේදන අධ්යක්ෂක ගරු ජූඩ් ක්රිසන්ත පියතුමා දැන් විශේෂ හෙළිදරව්වක් සිදු කර ඇත.
මේ පිළිබඳව අප කළ විමසීමකදී ජූඩ් ක්රිසන්ත පියතුමා අවධාරණය කළේ අගරදගුරු හිමිපාණන් සිය ධුරයෙන් ඉවත්වීමට තීරණය කර ඇති බවට පැතිර යන පුවත සම්පූර්ණයෙන්ම අසත්ය බවයි. කතෝලික සභා නීතියට අනුව අගරදගුරු වරයෙකුට වයස අවුරුදු 80ක් පිරෙන විට විශ්රාමය සම්බන්ධයෙන් සලකා බැලීම සාමාන්ය ක්රමවේදය වුවද, කාදිනල් හිමිපාණන්ගේ විශ්රාමය සම්බන්ධයෙන් මෙතෙක් කිසිදු නිල තීරණයක් ගෙන නොමැති බව ඒ මහතා පෙන්වා දෙයි. ලබන වසරේදී කාදිනල් හිමිපාණන්ට වයස අවුරුදු 80ක් පිරුණද, උන්වහන්සේගේ සේවය පිළිබඳ අවසන් තීරණය ගැනීමේ බලය පවතින්නේ වතිකානුව සහ ශුද්ධෝත්තම පාප්වහන්සේ සන්තකයේ පමණක් බව පියතුමා වැඩිදුරටත් සිහිපත් කළේය.
මෙවැනි සංවේදී පුවත් ජනගත කිරීමේදී වඩාත් වගකීමෙන් කටයුතු කළ යුතු බව පවසන සන්නිවේදන අධ්යක්ෂකවරයා, වතිකානුවෙන් නිල ප්රකාශයක් ලැබෙන තෙක් කිසිදු ප්රධාන නායකත්ව වෙනසක් අපේක්ෂා කළ නොහැකි බව තහවුරු කළේය. දේශපාලන සහ සමාජීය වශයෙන් දැවැන්ත බලපෑමක් ඇති නායකයෙකුගේ ධුර කාලය පිළිබඳව පළවන වාර්තා අසත්ය බවට පත්වීමත් සමඟ, තවදුරටත් උන්වහන්සේගේ නායකත්වය ශ්රී ලාංකේය කතෝලික සභාවට හිමිවන බව තහවුරු වේ. අවසානයේදී, නායකත්වයේ වෙනස තීරණය වන්නේ ලාංකේය ආරංචි මාර්ගවලින් නොව රෝමයේ වතිකානු මූලස්ථානයෙන් ලැබෙන නිල නියෝගයකින් පමණක් බව අප සියල්ලෝම වටහා ගත යුතුය.
