ශ්රී ලංකා මහ බැංකුවේ ප්රධාන ප්රකාශන ද්විත්වයක් වන “වාර්ෂික ආර්ථික විවරණය 2025” සහ “මූල්ය ප්රකාශ සහ මෙහෙයුම් 2025” වාර්තා අද (අප්රේල් 20) පස්වරුවේ ජනාධිපති කාර්යාලයේදී ජනාධිපති අනුර කුමාර දිසානායක මහතා වෙත පිළිගන්වන ලදී. මුදල්, ක්රමසම්පාදන සහ ආර්ථික සංවර්ධන අමාත්යවරයා ලෙස ජනාධිපතිවරයා වෙත මෙම වාර්තා පිළිගන්වනු ලැබුවේ මහ බැංකු අධිපති ආචාර්ය පී. නන්දලාල් වීරසිංහ මහතා විසිනි.
ගෝලීය වෙළෙඳ සහ භූ දේශපාලනික අවිනිශ්චිතතා මෙන්ම 2025 වසර අගභාගයේදී බලපෑ අයහපත් කාලගුණික තත්ත්වයන් හමුවේ වුවද, ශ්රී ලංකා ආර්ථිකය ඔරොත්තු දීමේ හැකියාව ප්රදර්ශනය කර තිබේ. සාර්ව ආර්ථික ස්ථායීතාව අඛණ්ඩව පවත්වා ගැනීම සහ ක්රියාත්මක වන ව්යුහාත්මක ප්රතිසංස්කරණ හේතුවෙන් පෙර වසරවල ලැබූ ප්රගතිය තවදුරටත් ශක්තිමත් කර ගැනීමට හැකි වී ඇති බව වාර්තාවේ සඳහන් වේ.
වැඩිදියුණු වූ ප්රතිපත්තිමය ස්ථාවරත්වය සහ ආයෝජන විශ්වාසය හරහා අනාගත ආර්ථික කම්පනවලට මුහුණ දීම සඳහා අවශ්ය ස්වාරක්ෂක (Buffers) ගොඩනැංවීමටත්, තිරසාර ආර්ථික වර්ධනයකට මග පෑදීමටත් ආර්ථිකය සතු හැකියාව වර්ධනය වී ඇති බව මහ බැංකුව පෙන්වා දෙයි.
මෙම අවස්ථාවට කම්කරු අමාත්ය සහ මුදල් හා ක්රමසම්පාදන නියෝජ්ය අමාත්ය ආචාර්ය අනිල් ජයන්ත ප්රනාන්දු, අමාත්යාංශ ලේකම් ආචාර්ය හර්ෂණ සූරියප්පෙරුම යන මහත්වරුන් ඇතුළු මහ බැංකුවේ ජ්යෙෂ්ඨ නිලධාරීන් පිරිසක් සහභාගී වූහ.
