මෙරට විද්යුත් අපද්රව්ය (Electronic Waste) නිසි ක්රමවේදයකින් තොරව පරිසරයට බැහැර කිරීම හේතුවෙන් උග්ර පාරිසරික ගැටලු රැසක් මතුවෙමින් පවතින බව මධ්යම පළාත් පාරිසරික සංවිධාන එකමුතුව අනතුරු අඟවයි.
පාරිසරික ගැටලු පිළිබඳව ඊයේ (19) පැවැති විමර්ශනයකදී අදහස් දක්වමින් එම සංවිධානයේ කැඳවුම්කරු සහ ‘ග්රැෆික් ශ්රී ලංකා පදනමේ’ විධායක අධ්යක්ෂ ගාමිණී ජයතිස්ස මහතා පෙන්වා දුන්නේ, නිවාසවල භාවිතා කරන විද්යුත් උපකරණවල කොටස් සහ බැටරි වැනි දෑ කිසිදු පාලනයකින් තොරව පරිසරයට මුදා හැරීම තුළින් දීර්ඝකාලීන පාරිසරික අවදානමක් නිර්මාණය වී ඇති බවයි.
පවතින ප්රධාන ගැටලු අතර විද්යුත් උපකරණවලින් ඉවත් කරන බැටරි මගින් පසට සිදුවන හානිය ඉතා බරපතළ මට්ටමක පැවතීම ප්රධානය. එමෙන්ම භාවිතා කර ඉවත් කළ විදුලි බුබුළු, රේඩියෝ සහ රූපවාහිනී අමතර කොටස් මෙන්ම විද්යුත් සෙල්ලම් බඩු ද රට පුරා පළාත්වල වගකීම් විරහිතව බැහැර කරනු ලැබේ. මෙවැනි අපද්රව්ය ස්වාභාවික ජල මූලාශ්රවලට එකතු වීමෙන් මසුන් ඇතුළු ජලජ ජීවීන්ගේ ජීවන චක්ර බිඳ වැටීම සහ පාරිසරික සමතුලිතතාවයට හානි සිදුවීම බරපතළ තත්ත්වයක් බව පෙන්වා දෙනු ලැබේ.
මෙම අර්බුදයට විසඳුම් ලෙස රාජ්ය කාර්යාල සහ පාසල් ආසන්නයේ විද්යුත් අපද්රව්ය එකතු කිරීමේ මධ්යස්ථාන පිහිටුවීමත්, පළාත් මට්ටමින් විද්යුත් අපද්රව්ය නිසි ලෙස බැහැර කිරීම සඳහා විධිමත් යාන්ත්රණයක් සකස් කිරීමත් අත්යවශ්ය වේ. එසේම රාජ්ය ආයතන සහ පාසල් සිසුන් අතර විද්යුත් අපද්රව්ය කළමනාකරණය පිළිබඳව ආකල්පමය වෙනසක් ඇති කිරීමේ අඛණ්ඩ දැනුවත් කිරීමේ වැඩසටහන් ක්රියාත්මක කිරීමේ වැදගත්කම ද මෙහිදී අවධාරණය කෙරිණි.
මෙම අර්බුදය ජාතික මට්ටමේ පාරිසරික ගැටලුවක් බවත්, ඊට විසඳුම් සෙවීමට කඩිනම් පියවර ගත යුතු බවත් ගාමිණී ජයතිස්ස මහතා වැඩිදුරටත් අවධාරණය කළේය.
