“සිලෝන් තේ (Ceylon Tea) සුවිශේෂීත්වයේ 159 වසරක අභිමානය” යන තේමාව පෙරදැරි කරගනිමින්, නේපාලයේ කත්මන්ඩු (Kathmandu) නුවර පිහිටි ශ්රී ලංකා තානාපති නිල නිවසෙහිදී 2026 ජාත්යන්තර තේ දිනය (International Tea Day 2026) උත්කර්ෂවත් අන්දමින් සමරා තිබේ. නේපාල රජයේ නියෝජිතයන්, එරට තේ කර්මාන්තයේ ප්රධාන ආයෝජකයන් සහ සම්භාවනීය අමුත්තන් රැසකගේ සහභාගීත්වයෙන් මෙම විශේෂ සැමරුම් උත්සවය සංවිධානය කර තිබුණි.
මෙහිදී උත්සවයේ සමාරම්භක දේශනය සිදුකළ නේපාලයේ ශ්රී ලංකා තානාපතිනි රුවන්ති දෙල්පිටිය මහත්මිය, ලෝක ප්රකට සිලෝන් තේ සතු පොහොසත් ඉතිහාසය සහ ඊට ජාත්යන්තරව හිමි ගෞරවය පිළිබඳව දීර්ඝ වශයෙන් කරුණු පැහැදිලි කළාය. මෙවර ජාත්යන්තර තේ දිනයේ ගෝලීය තේමාව වන “තේ කර්මාන්තයේ තිරසාරභාවය – වගාකරුවන්ගේ අභිවෘද්ධිය” (Sustaining Tea, Supporting Communities) යන්න සිහිපත් කරමින්, තේ වගාකරන ජනතාවගේ සුභසාධනය, සදාචාරාත්මක නිෂ්පාදන ක්රියාවලිය සහ තිරසාරභාවය වෙනුවෙන් ශ්රී ලංකාව නිරන්තරයෙන් කැපවන බව ඇය අවධාරණය කළාය. සිලෝන් තේ යනු ශ්රී ලංකාවේ ප්රමුඛතම ගෝලීය සන්නාමයක් (Brand) පමණක් නොව, එය ශ්රී ලංකාව සහ නේපාලය අතර පවතින සංස්කෘතික සබඳතාවය, මිත්රත්වය සහ ආගන්තුක සත්කාරය විදහා දක්වන සංකේතයක් බව ද තානාපතිනිය වැඩිදුරටත් කියා සිටියාය.
එක්සත් ජාතීන්ගේ ආහාර හා කෘෂිකර්ම සංවිධානයේ (FAO) තේමාවන් පාදක කරගනිමින් මෙහිදී විශේෂ දේශන සහ නිල වීඩියෝ දර්ශන ඉදිරිපත් කෙරුණු අතර, තානාපති කාර්යාලයේ වාණිජ නිලධාරී බිබේක් වොස්ටි (Bibek Wosti) මහතා විසින් සිලෝන් තේ නිෂ්පාදනයේ ප්රමිතිකරණය සහ අපනයන වැදගත්කම පිළිබඳව විශේෂ ඉදිරිපත් කිරීමක් සිදු කළේය.
මෙම උත්සවයේ සුවිශේෂීම අංගය වූයේ ශ්රී ලංකාවේ ප්රධාන තේ වගාකරන කලාප 7 නියෝජනය කරමින් සකස් කර තිබූ ප්රදර්ශනය සහ තේ රස බැලීමේ අවස්ථාවයි (Tasting Session). එහිදී විවිධ තේ වර්ග, ඖෂධීය තේ (Herbal Teas) සහ සුවිශේෂී තේ නිෂ්පාදන රස බැලීමට පැමිණි අමුත්තන්ට අවස්ථාව උදාවිය. ප්රසිද්ධ ‘ඩිල්මා’ (Dilmah) තේ සමාගම ද තම නිෂ්පාදන මෙහිදී ප්රදර්ශනය කළ අතර, ශ්රී ලාංකීය සාම්ප්රදායික ආහාර සංස්කෘතිය සමඟ මුසු වූ තේ සහ තේ ආශ්රිත නවක පාන වර්ග (Tea Mocktails) රස විඳීමේ අවස්ථාව ද විදේශීය අමුත්තන් වෙනුවෙන් මෙහිදී සලසා දී තිබුණි.
