දේශපාලන හිතවත්කම් මත පත්වීම් ලබා දෙන පැරණි සංස්කෘතියට තිත තබමින්, කුසලතාව මත පමණක් තෝරාගත් කළමනාකරණ සේවා නිලධාරීන් 1,252 දෙනෙකු රාජ්ය සේවයට බඳවා ගැනීමට රජය පියවර ගෙන තිබේ. රාජ්ය පරිපාලන, පළාත් සභා සහ පළාත් පාලන අමාත්ය මහාචාර්ය චන්දන අබයරත්න මහතාගේ ප්රධානත්වයෙන් අරලියගහ මන්දිරයේදී මෙම පත්වීම් ලිපි ප්රදානය කෙරිණි.
අමාත්යවරයා සඳහන් කළ ප්රධාන කරුණු:
රාජ්ය සේවයට බඳවා ගැනීම් පසුගිය වසර කිහිපයක සිට ආර්ථික අර්බුදය හේතුවෙන් නතර වී තිබුණද, මේ වන විට ජනතාව අපේක්ෂා කළ ‘ක්රම වෙනස’ (System Change) ප්රායෝගිකව ක්රියාවට නංවමින් බඳවා ගැනීම් ආරම්භ කර ඇත.
85,000ක පමණ පිරිසක් අතරින් පූර්ණ කුසලතාව මතම තෝරාගත් මෙම නිලධාරීන් 1,252 දෙනා රටේ රාජ්ය සේවය ගුණාත්මකව හා කාර්යක්ෂමව ශක්තිමත් කිරීමට දායක වනු ඇත.
රජයේ ඉලක්කය වන ‘පොහොසත් රටක්, ලස්සන ජීවිතයක්’ සාක්ෂාත් කර ගැනීම සඳහා නිවැරදි ආර්ථික කළමනාකරණයක් හරහා 2025 වසරේ රාජ්ය භාණ්ඩාගාරයට විශාල ආදායමක් එකතු කර ගැනීමට රජය සමත් විය. එම ආර්ථික ශක්තිය මත පදනම්ව රාජ්ය සේවකයන්ගේ වැටුප් ඉහළ නැංවීමට සහ ඔවුන් රඳවා ගැනීමට රජය ක්රියාමාර්ග ගනිමින් සිටී.
2025 ජනවාරි සිට ආරම්භ වූ වැටුප් වැඩිවීම් ක්රියාවලිය 2026 සහ 2027 වසරවලදීත් අඛණ්ඩව සිදු කෙරේ. ඉදිරියේදී පවතින කළමනාකරණ සේවා නිලධාරී පුරප්පාඩු 3,000ක් ද පිරවීමට රජය අපේක්ෂා කරයි.
මෙම අවස්ථාව සඳහා රාජ්ය අමාත්ය රුවන් සෙනරත්, අමාත්යාංශ ලේකම් එස්. ආලෝක බණ්ඩාර සහ ඒකාබද්ධ සේවා අධ්යක්ෂ ජනරාල් එන්.යූ. නිෂාන් මෙන්ඩිස් යන මහත්වරුන් ඇතුළු නිලධාරීන් පිරිසක් එක්ව සිටියහ.
