අද දිනට (අප්රේල් 30) යෙදී ඇති ශාරීරික දණ්ඩනය අවසන් කිරීමේ ජාත්යන්තර දිනය වෙනුවෙන් ජාතික ළමා ආරක්ෂක අධිකාරිය විශේෂ නිවේදනයක් නිකුත් කර තිබේ. දරුවන් විනයගත කිරීම සඳහා ශාරීරික දඬුවම් භාවිතය ඔවුන්ගේ පෞරුෂත්වයට කෙටි කාලීන සහ දිගු කාලීන වශයෙන් අහිතකර ලෙස බලපාන බව පර්යේෂණ මගින් තහවුරු වී ඇති බව එහි සඳහන් වේ.
එක්සත් ජාතීන්ගේ ළමා අයිතිවාසිකම් සම්මුතියට අනුව ළමුන්ට සියලු ආකාරයේ අපයෝජනවලින් ආරක්ෂා වීමේ අයිතිය ඇති අතර ශ්රී ලංකාව 1990 වසරේ සිට ඒ සඳහා බැඳී සිටී. 1978 ආණ්ඩුක්රම ව්යවස්ථාවේ 11 වන ව්යවස්ථාව මගින්ද කිසිදු පුද්ගලයෙකු කෲර හෝ අමානුෂික දඬුවමකට ලක් නොවිය යුතු බවට මූලික අයිතිවාසිකමක් තහවුරු කර ඇත. මීට අමතරව දණ්ඩ නීති සංග්රහය සහ අධ්යාපන අමාත්යාංශයේ 11/2026 වක්ර ලේඛය මගින්ද ළමුන් හික්මවීමට හිංසනය භාවිත නොකළ යුතු බව දක්වා ඇත
ශ්රී ලංකාව තුළ වාර්තා වන ළමා අපයෝජන පැමිණිලි අතරින් දෙවන වැඩිම පැමිණිලි ප්රමාණය ශාරීරික හිංසනයන් වන අතර වාර්ෂිකව පැමිණිලි 2000ත් 2500ත් අතර ප්රමාණයක් වාර්තා වේ. 2024 වසරේ බොගෝටාහිදී පැවති ලෝක සම්මේලනයේදී දෙනු ලැබූ ප්රතිඥාවකට අනුව ළමුන් හික්මවීමට යොදාගන්නා ශාරීරික දඬුවම් තහනම් කිරීමට ශ්රී ලංකාව එකඟ වී ඇත.
ප්රචණ්ඩත්වයෙන් තොර පාසල් පරිසරයක් නිර්මාණය කිරීම සඳහා ධනාත්මක ශික්ෂණය පිළිබඳ ගුරුවරුන්ගේ දැනුම වර්ධනය කිරීමට ජාතික ළමා ආරක්ෂක අධිකාරිය කටයුතු කරයි. ශාරීරික දණ්ඩනය වෙනුවට ධනාත්මක ශික්ෂණ ක්රමවේද වෙත නැඹුරු වන ලෙස අධිකාරිය දෙමාපියන්ගෙන් සහ ගුරුවරුන්ගෙන් ඉල්ලා සිටී.
