පවුල් සංස්ථාව බිඳවැටීම හේතුවෙන් දරුවන් අනාථ වීම ළමා අපයෝජන ඉහළ යාමට ප්රධානතම හේතුව වී ඇති බවත්, මත්ද්රව්ය ජාවාරම්කරුවන් වයස අවුරුදු 11ත් 17ත් අතර දරුවන් ප්රධාන ඉලක්ක කරගෙන ඇති බවත් රාජ්ය පරිපාලන, පළාත් සභා සහ පළාත් පාලන අමාත්ය මහාචාර්ය චන්දන අබයරත්න මහතා පවසයි. පුත්තලම දිස්ත්රික්කයේ පල්ලම ප්රාදේශීය සම්බන්ධීකරණ කමිටු රැස්වීමට එක්වෙමින් අමාත්යවරයා මේ බව අවධාරණය කළේය.
පල්ලම ප්රදේශයෙන් පසුගිය මාස පහ තුළ ළමා අපයෝජන සිද්ධීන් 9ක් වාර්තා වී ඇති අතර, එයට ප්රධාන හේතුව වී ඇත්තේ දෙමාපියන් විදේශගත වීම, මියයාම හෝ මත්ද්රව්යවලට ඇබ්බැහි වීම හේතුවෙන් දරුවන් පවුලෙන් හුදෙකලා වීම බව අනාවරණය වී තිබේ. මෙම සමාජ ව්යසනය වළක්වා ගැනීමට මහජන නියෝජිතයින්, නිලධාරීන් සහ පුරවැසියන් ලෙස සැමට වගකීමක් පවතින බව අමාත්යවරයා පෙන්වා දුන්නේය.
මත්ද්රව්ය ජාවාරම මර්දනය සඳහා රජය විසින් “ඉවත්වනු” නමින් විශේෂ වැඩසටහනක් ක්රියාත්මක කර ඇති බවත්, අයිස් සහ හෙරොයින් වැනි මත්ද්රව්ය ජාවාරම් පිටුපස සිටින සංවිධානාත්මක කණ්ඩායම් මැඩලීමට පොලිසියට තොරතුරු ලබාදීමට බියක් ඇත්නම්, ඒ පිළිබඳව වයඹ පළාත් භාර නියෝජ්ය පොලිස්පතිවරයා වෙත සෘජුවම දැනුම් දිය හැකි බවත් ඔහු සඳහන් කළේය.
මීට අමතරව, මාර්ග ආරක්ෂාව සම්බන්ධයෙන් අදහස් දැක්වූ අමාත්යවරයා, තරුණ කණ්ඩායම් හිස් ආවරණ (Helmets) රහිතව ගමන් කිරීම පාලනය කිරීමට දැඩිව නීතිය ක්රියාත්මක කරන ලෙස පොලිසියට උපදෙස් දුන්නේය. එසේම, ප්රදේශයේ නැවත හිස ඔසවමින් පවතින අනවසර වැලි ජාවාරම නැවැත්වීම සඳහා කැණීම්, ප්රවාහනය හා වැලි ළඟ තබා ගැනීම් සම්බන්ධයෙන් දැඩි නීතිමය පියවර ගන්නා ලෙස ද ඔහු අවධාරණය කළේය. මෙම ගැටලු පක්ෂ, ජාති හෝ ආගම් භේදයකින් තොරව පොදුවේ විසඳා ගත යුතු බවත්, රටේ දරුවන්ගේ අනාගතය සුරක්ෂිත කිරීම සඳහා සියලු දෙනා සාමූහිකව කටයුතු කළ යුතු බවත් මහාචාර්ය චන්දන අබයරත්න මහතා වැඩිදුරටත් අවධාරණය කළේය.
