වසර 30ක කාලයක් පුරා චීන යුවාන් බිලියන 2.2කට අධික (අමෙරිකානු ඩොලර් මිලියන 325ක්) දැවැන්ත මුදලක් අල්ලස් වශයෙන් ලබාගත් හිටපු නගර සභා නිලධාරියෙකුට චීනයේ නැගෙනහිර ප්රදේශයේ අධිකරණයක් විසින් මරණ දඬුවම නියම කර තිබේ. චීන ජනාධිපති ෂී ජින්පින්ගේ දැවැන්ත දූෂණ විරෝධී මෙහෙයුම්වල ප්රතිඵලයක් ලෙස මෙලෙස දඬුවම් ලැබුවේ 1993 සිට 2023 දක්වා නැන්ජින් (Nanjing) නගරයේ විවිධ උසස් තනතුරු දැරූ 69 හැවිරිදි යැං යූලින් (Yang Youlin) නැමැති නිලධාරියාය. ඔහු අල්ලස් ගැනීමට අමතරව රජයේ මුදල් අවභාවිතය, බලය අනිසි ලෙස භාවිතා කිරීම සහ කළු සල්ලි ජාවාරම් කිරීම යන චෝදනාවලටද වරදකරු වී ඇත.
චැංෂු (Changzhou) නගරයේ අධිකරණය සඳහන් කළේ, යැං විසින් සිය නිල තල සහ බලය උපයෝගී කරගනිමින් විවිධ පුද්ගලයන්ට ඉංජිනේරු කොන්ත්රාත්තු සහ ඉඩම් පැවරීම් ලබා දෙමින් මෙම නීතිවිරෝධී වත්කම් උපයාගෙන ඇති බවයි. චීනය තුළ සුදු කරපටි අපරාධ (White-collar crimes) වෙනුවෙන් මරණ දඬුවම පැමිණවීම සාපේක්ෂව දුර්ලභ වුවද, වංචා කළ මුදල යුවාන් බිලියනය ඉක්මවන මෙවැනි අවස්ථාවලදී අධිකරණය දැඩි තීන්දු ලබා දෙයි. මීට පෙර 2021 වසරේදී ලායි සියාඕමින් (යුවාන් බිලියන 1.8ක් අල්ලස් ගත්) සහ 2024 වසරේදී ලී ජියැන්පින් (යුවාන් බිලියන 3කට අධික මුදලක් වංචා කළ) යන නිලධාරීන්ටද චීනය තුළ මරණ දඬුවම ක්රියාත්මක කර තිබුණි. මෙම නඩු තීන්දුවත් සමඟ යැංගේ සියලු වත්කම් රාජසන්තක කිරීමටද අධිකරණය නියෝග කර ඇත.
