ඇමෙරිකා-ඊශ්රායල සහ ඉරානය අතර පවතින යුදමය වාතාවරණය හේතුවෙන් ලොව පුරා රටවල් ආර්ථික පීඩනයකට ලක්ව සිටියද, වසරේ මුල් මාස තුන තුළ චීන ආර්ථිකය අපේක්ෂිත මට්ටමට වඩා වේගවත් වර්ධනයක් පෙන්නුම් කර තිබේ. නිල දත්ත වලට අනුව, චීනයේ දළ දේශීය නිෂ්පාදිතය (GDP) පෙර වසරට සාපේක්ෂව 5% කින් ඉහළ ගොස් ඇත. ආර්ථික විද්යාඥයන් මීට පෙර පුරෝකථනය කර තිබුණේ මෙය 4.8% ක අගයක් ගනු ඇති බවයි.
පසුගිය පෙබරවාරි 28 වනදා ආරම්භ වූ මැදපෙරදිග ගැටුම් හේතුවෙන් ගෝලීය බලශක්ති සැපයුමට දැඩි බාධා එල්ල වී ඇති අතර, විශේෂයෙන්ම ආසියාතික රටවලට මෙයින් දැඩි බලපෑමක් එල්ල වී තිබේ. එවැනි අභියෝගාත්මක වටපිටාවක වුවද චීනය මෙම වර්ධනය වාර්තා කිරීම විශේෂත්වයකි. පසුගිය වසරේ අවසන් කාර්තුවේ පැවති 4.5% ක වර්ධන වේගය මෙලෙස 5% දක්වා ඉහළ යාමට ප්රධාන වශයෙන්ම නිෂ්පාදන අංශයේ (Manufacturing) දියුණුව හේතු වී ඇති අතර, මෝටර් රථ ඇතුළු අපනයන ක්ෂේත්රය මෙහිදී කැපී පෙනෙන දායකත්වයක් ලබා දී ඇත.
කෙසේ වෙතත්, දේපළ වෙළඳාම් අංශයේ ආයෝජන පහත වැටීම චීන ආර්ථිකයට තවමත් ගැටලුවක්ව පවතින බව විකීලේෂකයෝ පෙන්වා දෙති. ඉරාන යුද්ධයේ සම්පූර්ණ බලපෑම ඉදිරි මාසවලදී වඩාත් තදින් දැනෙනු ඇති බවත්, වෙළඳ කටයුතු වලට එල්ල වන බාධා හේතුවෙන් මීළඟ කාර්තුවේ ආර්ථික වර්ධන වේගය මීට වඩා අඩු විය හැකි බවත් ආර්ථික විශේෂඥ කයිල් චෑන් (Kyle Chan) ප්රකාශ කර තිබේ. චීන රජය පසුගිය මාර්තු මාසයේදී සිය වාර්ෂික ආර්ථික වර්ධන ඉලක්කය 4.5%-5% අතර අගයකට සීමා කළ අතර, නවීන තාක්ෂණික කර්මාන්ත සහ නවෝත්පාදන සඳහා වැඩි වශයෙන් ආයෝජනය කිරීමට ද සැලසුම් කර ඇත.
