ඩෙන්මාර්ක පාපන්දු ක්රීඩක ක්රිස්ටියන් එරික්සන් යුක්රේනය සමඟ පැවැති මිත්රත්ව තරගයකදී ක්රීඩා පිටියේදී ඇදවැටී ඇති බව ඩෙන්මාර්ක පාපන්දු සම්මේලනය නිවේදනය කරයි. කෙසේ වෙතත්, මේ වන විට ඔහු සිහිය ලබා ඇති අතර තත්ත්වය යහපත් බව බලධාරීන් තහවුරු කර තිබේ. මෙම සිදුවීමත් සමඟ තරගය අතරමගදී නතර කිරීමට පියවර ගැනුණි.
මෙම 34 හැවිරිදි ක්රීඩකයා මීට පෙර 2021 වසරේ යුරෝපා පාපන්දු ශූරතාවලියේදී ද මෙවැනිම ආකාරයෙන් ඇදවැටුණු අතර, එහිදී ඔහුට ජීවිතාරක්ෂක CPR ප්රතිකාර ලබා දෙන ලදී. ඉන්පසුව හෘද ස්පන්දනය නියාමනය කිරීම සඳහා ඔහුට ‘Implantable Cardioverter-Defibrillator’ (ICD) නම් උපකරණයක් බද්ධ කරන ලදී.
පසුගිය ඉරිදා පැවැති තරගයේ දෙවන අර්ධයේ විනාඩි 20ක් ගතවෙද්දී ඔහු යළිත් ඇදවැටුණු අතර, ක්රීඩකයින් වහාම ඔහු වටා ආරක්ෂක වළල්ලක් ගොඩනැගීමට පියවර ගත්හ. වෛද්ය කණ්ඩායම්වල සහාය ඇතිව ඔහුට ඇවිදගෙන ගොස් ගිලන් රථයට නැගීමට හැකි වූ බව වාර්තා වේ.
එරික්සන්ගේ හෘද ස්පන්දනය නියාමනය කරන එම උපකරණය නිසි ලෙස ක්රියාත්මක වූ බවත්, ඔහු ඉතා ඉක්මනින් සිහිය ලබාගත් බවත් ඩෙන්මාර්ක කණ්ඩායමේ වෛද්ය මෝර්ටන් බෝසන් පවසයි. ඔහු දැනට රෝහල්ගතව වැඩිදුර පරීක්ෂණවලට ලක්වෙමින් පවතින අතර, තමා යහපත් තත්ත්වයෙන් සිටින බව සෙසු ක්රීඩකයින්ට දැනුම් දෙන ලෙස ඔහු වෛද්යවරයාගෙන් ඉල්ලා තිබේ.
