ඉරාන යුද්ධය හේතුවෙන් ඇමරිකාව සහ යුරෝපීය මිත්ර රටවල් අතර මතභේද උග්ර වී පවතින පසුබිමක නේටෝ සංවිධානයේ අනාගතය සුරක්ෂිත කිරීම සඳහා යුරෝපය කැපවී සිටින බව ජර්මානු චාන්සලර් ෆ්රෙඩ්රික් මර්ස් මහතා අවධාරණය කරයි. ස්වීඩන අග්රාමාත්ය උල්ෆ් ක්රිස්ටර්සන් සමඟ පැවැති සාකච්ඡාවකින් පසු මාධ්ය අමතමින් ඔහු සඳහන් කළේ දෙපාර්ශවය අතර යම් යම් අදහස් පරස්පරතාවන් පැවතියද ඉරානය න්යෂ්ටික අවි නිෂ්පාදනය කිරීම වැළැක්වීම සහ පවතින ගැටුම්කාරී තත්ත්වය සමථයකට පත් කිරීම ඇමරිකාවේ සහ යුරෝපයේ පොදු අභිප්රාය බවයි. යුරෝපීය ආරක්ෂක ව්යුහය ශක්තිමත් කිරීම සඳහා ස්වීඩනය සහ පින්ලන්තය ලබා දෙන දායකත්වය ද මෙහිදී ඇගයීමට ලක් විය.
ජර්මානු චාන්සලර්වරයා විසින් ඉරානය හමුවේ ඇමරිකාව අවම තත්ත්වයකට පත්ව ඇති බවට කළ ප්රකාශයක් මුල් කරගනිමින් ජනාධිපති ඩොනල්ඩ් ට්රම්ප් විසින් ජර්මනියේ සිටි ඇමරිකානු සෙබළුන් 5,000ක් ඉවත් කිරීමට මීට පෙර පියවර ගෙන තිබුණි. මෙම තත්ත්වය හමුවේ වුවද ඇමරිකානු හමුදා සහාය යුරෝපයට තවදුරටත් අවශ්ය බව පවසන මර්ස් මහතා වැදගත් වන්නේ සෙබළුන් සංඛ්යාව නොව පොදු අරමුණක් වෙනුවෙන් පෙනී සිටීම බව පෙන්වා දෙයි. රුසියාවෙන් එල්ල විය හැකි තර්ජන හමුවේ ජර්මනිය ඇතුළු යුරෝපීය රටවල් සිය හමුදා ශක්තිය නැංවීමට මේ වන විට බිලියන ගණනින් මුදල් ආයෝජනය කරමින් සිටින බව ද වාර්තා වේ.
මේ අතර රුසියාවේ පැවැති විජයග්රාහී සැමරුම් පෙළපාලියට සහභාගී වීමට ස්ලෝවැකියානු අග්රාමාත්ය රොබට් ෆිකෝ ගත් තීරණය පිළිබඳව ද ජර්මානු චාන්සලර්වරයා සිය නොසතුට පළ කර ඇත. රුසියාව යුරෝපයට එල්ල කරන බලපෑම් හමුවේ මෙවැනි පියවරයන් මිත්ර රටවල් අතර පවතින ඒකීයභාවයට බාධාවක් විය හැකි බව ඔහුගේ අදහසයි. කෙසේ වෙතත් පවතින සංකීර්ණ දේශපාලන තත්ත්වය හමුවේ වුවද අත්ලාන්තික් සාගරය හරහා පවතින සබඳතා ශක්තිමත්ව පවත්වාගෙන යාම ලෝක සාමයට අත්යවශ්ය කරුණක් බව ඔහු වැඩිදුරටත් සඳහන් කළේය.
