ඇමෙරිකානු කොන්ග්රස් මණ්ඩලය වෙත බලපෑම් කරමින් කොයින්බේස් (Coinbase) සමාගමේ ප්රධාන නීති නිලධාරී පෝල් ග්රේවාල් (Paul Grewal) පවසා ඇත්තේ ‘CLARITY’ පනතට සහය දක්වන මන්ත්රීවරුන් ස්ටේබල්කොයින් සඳහා ලබාදෙන ප්රතිලාභ (rewards) තහනම් කිරීමට එරෙහි විය යුතු බවයි.
ස්ටේබල්කොයින් ගිණුම්වල පවත්වාගෙන යන ශේෂයන් සඳහා ලබාදෙන පොලී හෝ ප්රතිලාභ තහනම් කිරීමට සෙනෙට් මණ්ඩලය තුළ යෝජනාවක් ඉදිරිපත් වී තිබේ. බැංකු ක්ෂේත්රය පවසන්නේ මෙලෙස ප්රතිලාභ ලබාදීම නිසා සාමාන්ය බැංකු තැන්පතු ක්රිප්ටෝ වෙළඳපොළ වෙත ඇදී යාමේ අවදානමක් පවතින බවයි.
පෝල් ග්රේවාල් පවසන්නේ බැංකු තැන්පතු අඩුවීමේ තර්කය හුදෙක් උපකල්පනයක් පමණක් බවයි. ස්ටේබල්කොයින් ප්රතිලාභ තහනම් කළද බැංකු ණය ලබාදීමේ හැකියාව කෙරෙහි ඇති වන බලපෑම 0.02%ක් වැනි ඉතා සුළු අගයක් බව ධවල මන්දිර ආර්ථික උපදේශක සභාවේ වාර්තාවක් උපුටා දක්වමින් ඔහු පෙන්වා දෙයි.
2025 වසරේ කොයින්බේස් සමාගමේ ආදායමෙන් 19%ක් පමණ ලැබී ඇත්තේ ස්ටේබල්කොයින් ආශ්රිත ගනුදෙනුවලිනි. එබැවින් මෙම පනතේ අවසන් තීරණය කොයින්බේස් වැනි ප්රධාන ක්රිප්ටෝ හුවමාරු මධ්යස්ථානවල මූල්ය ව්යුහයට සෘජුවම බලපානු ඇත.
මෙම පනත මධ්යකාලීන මැතිවරණයට පෙර සම්මත නොවන්නේ නම්, එය 2030 වසර දක්වා ප්රමද විය හැකි බවට දේශපාලන විචාරකයෝ අනතුරු අඟවති. ‘CLARITY’ පනත හරහා ක්රිප්ටෝ ක්ෂේත්රයට පැහැදිලි නීතිමය රාමුවක් ලැබෙනු ඇතැයි අපේක්ෂා කෙරේ.
