කොළඹ සිට ගාල්ල දෙසට ධාවනය වූ ලොරි රථයකින් කළුගල් කුඩු හැලීම හේතුවෙන් ගාලු පාරේ කළුතර, වෙට්ටුමකඩ ප්රදේශයේ එක් මංතීරුවක් තාවකාලිකව වසා දැමීමට අද (23) අලුයම කටයුතු කර තිබේ. ලොරි රථයේ පිටුපස දොර විවෘත වීම හේතුවෙන් මාර්ගයේ මීටර් 800 කට ආසන්න දුරක් පුරා මෙලෙස ගල්කුඩු විසිරී ඇති බව කළුතර දකුණ පොලිසිය සඳහන් කරයි.
මාර්ගයේ වැටී තිබූ මෙම ගල්කුඩු මතින් ගමන් කිරීමට උත්සාහ කළ යතුරුපැදි හතරක් ලිස්සා යාමෙන් අනතුරට පත්ව ඇති බව වාර්තා වේ. අනාරක්ෂිත සහ අපරීක්ෂාකාරී ලෙස ගල්කුඩු ප්රවාහනය කළ අදාළ ලොරි රථය සහ රියදුරු කළුතර දකුණ පොලිසිය විසින් අත්අඩංගුවට ගෙන ඇත. මාර්ගය යථා තත්ත්වයට පත් කරන තෙක් එම ප්රදේශයේ රථවාහන ධාවනය සීමා කර ඇති බැවින් විකල්ප මාර්ග භාවිතා කරන ලෙස රියදුරන්ගෙන් ඉල්ලා සිටී.
