පෞද්ගලික බැංකුවක පොදු ලෙජර් ගිණුම හරහා සිදුව ඇති රුපියල් බිලියන 13ක මහා පරිමාණ මුදල් වංචාව සම්බන්ධයෙන් කෙරෙන අභ්යන්තර විගණන කටයුතුවලදී, බැංකුවේ පරිගණක දත්ත පද්ධතියට හානියක් නොවන ලෙස කටයුතු කරන්නැයි කොළඹ ප්රධාන මහේස්ත්රාත් අසංග එස්. බෝදරගම මහතා අද (08) එම බැංකුවට නියෝග කළේය.
අපරාධ පරීක්ෂණ දෙපාර්තමේන්තුවේ (CID) අන්තර්ජාල ආවේක්ෂණ අංශය කළ ඉල්ලීමක් සලකා බලමින් මහේස්ත්රාත්වරයා මෙම නියෝගය නිකුත් කරන ලදී. විමර්ශනවලට අදාළ මුල් දත්ත සුරක්ෂිතව තබා ගනිමින් විගණන වාර්තා සකස් කරන ලෙස එහිදී අවධාරණය කෙරිණි. බැංකුව වෙනුවෙන් පෙනී සිටි නීතිඥවරුන් සඳහන් කළේ සියලුම අභ්යන්තර විගණන කටයුතු මේ වන විට සිදුකෙරෙන බවත්, විමර්ශන සඳහා පූර්ණ සහයෝගය ලබාදෙන බවත්ය.
මෙම සිද්ධියට අදාළව බැංකුවේ තිබූ ලැප්ටොප් පරිගණක දෙකක් සහ ඩෙස්ක්ටොප් පරිගණක තුනක් සම්බන්ධයෙන් දැනට විමර්ශන ක්රියාත්මක වන බව CID නිලධාරීන් අධිකරණයට දන්වා සිටියේය. බැංකුවේ තවත් පිරිසකගෙන් ප්රකාශ සටහන් කර ගැනීමෙන් අනතුරුව, ඉදිරියේදී තවත් පරිගණක අත්අඩංගුවට ගන්නේද යන්න තීරණය කරන බව ද ඔවුහු පැවසූහ.
2024 වසරේ සිට බැංකුවේ සිදුව ඇති සියලුම විගණන වාර්තා පරීක්ෂා කරන ලෙසත්, මෙම වංචාව සම්බන්ධයෙන් ඉහළ නිලධාරීන් හෝ පද්ධති සුපරීක්ෂකවරුන් දැනුවත්ව සිටියේද යන්න විමර්ශනය කරන ලෙසත් මහේස්ත්රාත්වරයා මීට පෙර CIDයට නියෝග කර තිබුණි. කිසියම් පුද්ගලයෙකු සාපරාධී වරදක් කර ඇති බව අනාවරණය වුවහොත් ඔවුන්ට එරෙහිව කරුණු දක්වන ලෙස ද අධිකරණය වැඩිදුරටත් දන්වා ඇත.
