මෙරට ඩිජිටල් ගනුදෙනු පද්ධතිය තවදුරටත් ශක්තිමත් කරමින්, කොමර්ෂල් බැංකුව (Commercial Bank of Ceylon) ශ්රී ලංකාවේ සහ සමස්ත දකුණු ආසියානු කලාපයේම ප්රථම මූල්ය ආයතනය බවට පත්වෙමින් UnionPay කාඩ්පත්හි e-commerce (අන්තර්ජාල) ගනුදෙනු සඳහා අතිනවීන 3-D Secure (3DS 2.x) ආරක්ෂණ සත්යාපන තාක්ෂණය හඳුන්වා දීමට පියවර ගෙන තිබේ. මෙම නවීන තාක්ෂණික එකතුවත් සමඟ UnionPay කාඩ්පත් හිමියන්ට ලොව පුරා විසිරී ඇති මිලියන සංඛ්යාත වෙළෙඳ සේවා ජාලයන් හරහා අතිශය සුරක්ෂිතව සහ විශ්වාසවන්තව භාණ්ඩ හා සේවා මිලදී ගැනීමට අවස්ථාව හිමිවේ. කොමර්ෂල් බැංකුවේ ජාත්යන්තර කාඩ්පත් පද්ධතිය සතු ඉහළම මට්ටමේ වංචා වැළැක්වීමේ ආරක්ෂාව (Fraud Protection) දැන් UnionPay පරිශීලකයින්ට ද සෘජුවම හිමිවනු ඇත.
මෙම නව ආරක්ෂණ පද්ධතිය කොමර්ෂල් බැංකුවේ Access Control Server (ACS) වේදිකාව සමඟ සාර්ථකව ඒකාබද්ධ කර ඇති අතර, එමඟින් UnionPay කාඩ්පත් සඳහාම විශේෂිත වූ අවදානම් මත පදනම් වූ සත්යාපන (Risk-Based Authentication – RBA) ක්රමවේදයක් ක්රියාත්මක වේ. ඒ අනුව පාරිභෝගිකයෙකු අන්තර්ජාලය හරහා ගනුදෙනුවක් සිදු කරන විට, පද්ධතිය විසින් එම අවස්ථාවේදීම (Real-time) එහි ආරක්ෂාව ස්වයංක්රීයව ඇගයීමට ලක් කරයි. එහිදී අතිරේක සත්යාපනයක් අවශ්ය යැයි පද්ධතිය හඳුනාගතහොත්, පාරිභෝගිකයාගේ ලියාපදිංචි ජංගම දුරකථන අංකයට සහ විද්යුත් ලිපිනයට (Email) එක් වරක් පමණක් භාවිත කළ හැකි රහස්ය අංකයක් (OTP) ක්ෂණිකව ලැබීමට සලස්වයි. පාරිභෝගිකයා එම OTP අංකය ඇතුළත් කිරීමෙන් පසු ගනුදෙනුව සාර්ථකව අවසන් කළ හැකිය. නමුත් ගනුදෙනුව අවදානමෙන් තොර (Low risk) එකක් ලෙස පද්ධතිය හඳුනාගතහොත්, කිසිදු බාධාවකින් තොරව (Frictionless) ඉතා වේගයෙන් ගනුදෙනුව අවසන් කිරීමට ඉඩ සලසයි.
කොමර්ෂල් බැංකුවේ පුද්ගලික බැංකුකරණ සහ සිල්ලර නිෂ්පාදන අංශයේ සහකාර සාමාන්යාධිකාරී කපිල ලියනගේ මහතා ප්රකාශ කර සිටින්නේ, මෙමඟින් තවත් සුවිශේෂී පාරිභෝගික පිරිසකට ගෝලීය මට්ටමේ ආරක්ෂිත ඩිජිටල් ගෙවීම් විසඳුම් සලසා දී ඇති බවයි. යුනියන්පේ ඉන්ටර්නැෂනල් (UnionPay International) ආයතනයේ ශ්රී ලංකා සහ මාලදිවයින පිළිබඳ දේශීය කළමනාකාර ක්රිස්පින් විජේසේකර මහතා සඳහන් කළේ, අන්තර්ජාල වාණිජ්යය වේගයෙන් වර්ධනය වන වර්තමාන වටපිටාව තුළ මෙම 3DS තාක්ෂණය මඟින් ඩිජිටල් ගෙවීම් කෙරෙහි පාරිභෝගික විශ්වාසය සහ ආරක්ෂාව ඉහළ නංවන බවයි. වෙළෙඳපොළ ප්රාග්ධනීකරණය ඇමෙරිකානු ඩොලර් බිලියනය ඉක්මවූ සහ ලොව විශිෂ්ටතම බැංකු 1000 අතරට ශ්රේණිගත වූ මෙරට පළමු බැංකුව වන කොමර්ෂල් බැංකුව, සිය ඩිජිටල් නවෝත්පාදන උපායමාර්ගය යටතේ පාරිභෝගිකයින්ට උපරිම විශ්වාසනීය සේවාවක් සැපයීමට මෙලෙස අඛණ්ඩව කටයුතු කරමින් සිටී.
