ශ්රී ලංකාවේ පොදු මගී ප්රවාහන පද්ධතිය නවීකරණය කිරීමේ අරමුණින් කොමර්ෂල් බැංකුව සහ NCG Express ආයතනය එක්ව සම්පූර්ණයෙන්ම ඩිජිටල්කරණය වූ බස් ටිකට්පත් නිකුත් කිරීමේ පද්ධතියක් හඳුන්වා දී ඇත. රජයේ ඩිජිටල්කරණ වැඩපිළිවෙළට සහය දක්වමින් ක්රියාත්මක වන මෙම ව්යාපෘතිය හරහා මගීන්ට තම බැංකු කාඩ්පත්, QR කේත හෝ Contactless තාක්ෂණය භාවිතයෙන් ඉතා පහසුවෙන් බස් ගාස්තු ගෙවීමේ හැකියාව හිමිවේ.
මෙම නව ක්රමවේදය යටතේ NCG Express බස් රථවල කොන්දොස්තරවරුන් වෙත නවීන ඩිජිටල් උපාංග ලබා දී ඇති අතර, මගීන්ට Google Pay වැනි ජංගම මුදල් පසුම්බි හරහා ද ක්ෂණිකව ගෙවීම් කළ හැකිය. මෙහි ප්රධානතම අරමුණ වන්නේ මගීන් මුහුණ දෙන මාරු කාසි පිළිබඳ ගැටලුව විසඳීම, ප්රවේශපත්ර නිකුත් කිරීමේ විනිවිදභාවය තහවුරු කිරීම සහ ප්රවාහන අංශයේ මෙහෙයුම් කාර්යක්ෂමතාව ඉහළ නැංවීමයි.
කොමර්ෂල් බැංකුවේ සහකාර සාමාන්යාධිකාරී කපිල ලියනගේ මහතා සඳහන් කළේ, මෙම පියවර ජාතික ඩිජිටල්කරණ න්යාය පත්රයට බැංකුව දක්වන සක්රීය දායකත්වයක් බවයි. දැනට තෝරාගත් බස් රථ කිහිපයක ආරම්භ කර ඇති මෙම සේවාව ඉදිරියේදී NCG Express සතු සියලුම බස් රථ දක්වා ව්යාප්ත කිරීමට සැලසුම් කර ඇති බව එම ආයතනයේ සභාපති නිකිත ග්රේරෝ මහතා ප්රකාශ කළේය. මෙය ශ්රී ලංකාවේ පොදු ප්රවාහන සේවාව ගෝලීය ප්රමිතීන්ට අනුව නවීකරණය කිරීමේ තීරණාත්මක සන්ධිස්ථානයක් වනු ඇත.
