2018 අංක 35 දරන මුදල් පනත සංශෝධනය කිරීම සඳහා වන මුදල් (සංශෝධන) පනත් කෙටුම්පත, පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් රැස්වූ රජයේ මුදල් පිළිබඳ කාරක සභාවේදී (COPF) සලකා බලා ඊට අනුමැතිය ලබා දී තිබේ. මෙම රැස්වීම සඳහා නියෝජ්ය අමාත්ය නිශාන්ත ජයවීර මහතා සහ පාර්ලිමේන්තු මන්ත්රීවරුන් වන රවී කරුණානායක, හර්ෂණ රාජකරුණා, නීතිඥ ලක්මාලි හේමචන්ද්ර සහ විජේසිරි බස්නායක යන මහත්ම මහත්මීන් සහභාගී වී ඇත.
ශ්රී ලංකාවේ විදුලි සංදේශ ක්ෂේත්රයේ යටිතල පහසුකම් පුළුල් කිරීම සහ ඩිජිටල් සම්බන්ධතාවය ඉහළ නැංවීම ඉලක්ක කර ගනිමින් මෙම සංශෝධනය යෝජනා වී තිබේ. 2026 අයවැය මඟින් මුලින්ම ඉදිරිපත් කරන ලද මෙම යෝජනාව මඟින් අලුතින් ඉදිකරන දුරකථන සන්නිවේදන කුළුණු සඳහා පනවා ඇති බද්දෙන් තාවකාලික සහනයක් ලබාදීම අපේක්ෂා කෙරේ. 2026 අප්රේල් මස ගැසට් නිවේදනයක් මඟින් ප්රසිද්ධ කර ඇති මෙම පනත් කෙටුම්පතේ ප්රධාන ප්රතිපාදනය වන්නේ, 2026 ජනවාරි 01 වන දින හෝ ඊට පසුව ඉදිකරන ක්රියාත්මක වන නව සන්නිවේදන කුළුණු සඳහා වසර පහක (05) බදු නිදහසක් ලබාදීමයි.
මීට අමතරව, 2011 අංක 21 දරන විදුලි සංදේශ බදු පනත සංශෝධනය කිරීමේ පනත් කෙටුම්පත ද මෙහිදී අවධානයට ලක්විය. එහිදී වත්මන් බදු අනුපාතයන් විධිමත් කිරීම සහ නෛතික රාමුව ශක්තිමත් කිරීමේ සංශෝධන සඳහා කාරක සභාවේ අනුමැතිය හිමි වූව ද, පාරිභෝගිකයන් විසින් ගෙවීම් පැහැර හරිනු ලැබූ අවස්ථාවලදී (Bad Debts) නොගෙවූ බිල්පත් මත තිබෙන බදු (Telecom Levy) අඩු කිරීමට ක්රියාකරුවන්ට අවසර ලබාදීමේ යෝජනාව සඳහා කාරක සභාවේ අනුමැතිය හිමි වී නොමැත. වත්මන් පනත යටතේ එවැනි අවස්ථාවල බදු ගණනය කිරීම් පිළිබඳ පැහැදිලි ප්රතිපාදන නොමැති බැවින් බදු පාලනය වඩාත් විනිවිදභාවයකින් සිදු කිරීමට නිලධාරීන් කරුණු පැහැදිලි කළ ද, එම බදු අඩුකිරීමේ කොටස කාරක සභාව විසින් ප්රතික්ෂේප කර තිබේ.
